Grýzııa halyqaralyq týrnırler ótkizetin kazınolar ashpaq
ASTANA. KAZINFORM — Grýzııanyń bıliktegi «Grýzın armany» partııasynyń parlament depýtattary qumar oıyndarynan halyqaralyq týrnırler ótkizetin kazınolarǵa salyq jeńildikterin engizýdi usyndy, dep habarlaıdy Kazinform agenttiginiń aımaqtaǵy menshikti tilshisi.
Zań jobasyna sáıkes, kazınolar júlde qory 3 mıllıon larıden (shamamen 1,1 mıllıon dollar) asatyn týrnırler úshin paıdalanylatyn oıyn ústelderine salynatyn salyqtan bosatylady.
Mundaı týrnırlerge qatysatyn sheteldik oıynshylar da utysqa salynatyn tabys salyǵynan bosatylady.
Jarystardy ótkizý úshin 100 000 ları (jylyna shamamen 37 000 dollar) turatyn arnaıy ruqsat alý qajet. Qatysýshylardyń keminde 70%-y sheteldik azamattar bolýy kerek.
Zań jobasynda ruqsat sharttaryn buzǵandarǵa 50 000 ları (shamamen 18 500 dollar), al ruqsatsyz týrnır ótkizgenderge 150 000 ları (shamamen 55 600 dollar) aıyppul salý kózdelgen. Belgilengen talaptardy oryndamaý ruqsattyń kúshin joıýǵa ákep soqtyrady.
Bul bastamany grýzın parlamentiniń Ekonomıkalyq saıasat jónindegi komıtetiniń tóraǵasy Shota Berekashvılı jáne depýtattar Tornıke Berekashvılı, Iraklıı Mezýrnıshvılı jáne Gıorgı Barvenashvılı kóterip otyr.
Avtorlardyń pikirinshe, poker jáne basqa da qumar oıyndardan halyqaralyq týrnırler ótkizý kóbirek sheteldikterdi tartýǵa septigin tıgizedi, týrızmdi damytady jáne ekonomıkalyq belsendilikti yntalandyrady.
2026 jyldyń 27 qazanynda parlament túzetýlerdi jedeldetilgen tártippen boıynsha qarastyra bastady. Ekonomıkalyq saıasat komıteti zań jobasyn qoldady. Túzetýler áli kúshine engen joq.
Eske sala keteıik, Bıyl Grýzııaǵa barǵan qazaqstandyq týrıster sany artqan.
Grýzııada Reseı shekarasyna baratyn joldaǵy 426 metrlik kópir salyndy.
