Grýzııa elektroshoker men gaz aerozol quraldaryn alyp júrýge tyıym salady

ASTANA. KAZINFORM — Grýzııa parlamenti «Qarý týraly» zańǵa túzetýlerdi birinshi oqylymda maquldady, onda jeke jáne zańdy tulǵalardyń elektroshokerdi jasaýy, satyp alýy, saqtaýy, alyp júrýi, tasymaldaýy jáne satýyna tolyq tyıym salynady, dep habarlaıdy Grýzııa parlamenti. 

Habarlanǵandaı, sheshim 78 daýyspen qabyldandy, bir daýys qarsy boldy.

Jobaǵa sáıkes, elektroshok qurylǵylary azamattyq aınalymda tek zańnamamen belgilengen tártipke sáıkes jáne tek memlekettik organdar, jekemenshik kúzet uıymdary jáne zańda tikeleı kórsetilgen basqa da uıymdardyń paıdalanýy úshin ǵana ruqsat etiledi.

Túzetýler sonymen qatar gaz aerozoldik qurylǵylary men akýstıkalyq (dybystyq) qarý túrlerin kirgizý, óndirý, jóndeý, eksporttaý, qaıta eksporttaý, tranzıtteý jáne satýǵa mindetti lıtsenzııalaý nemese ruqsat berýdi engizedi. 

Akýstıkalyq qarý men gaz aerozoldik qurylǵylardy paıdalanýǵa tek 18 jastan asqan azamattarǵa ІІM aýmaqtyq organynyń jazbasha kelisimimen ruqsat etiledi.

Zań jobasyn Grýzııa Іshki ister mınıstrligi ázirlep, úkimet engizdi. Onyń maqsaty — arnaıy jabdyqtar aınalymyna baqylaýdy kúsheıtý jáne qoǵamdyq qaýipsizdik deńgeıin jaqsartý.

BAQ-ta sondaı-aq elektroshokerdi jasaý, saqtaý, alyp júrý jáne tasymaldaý 500 ları (185 dollar) aıyppulmen jazalanatyny týraly habarlandy. Qaıtalap buzǵandar úshin 1000 ları (370 dollar) aıyppul qarastyrylǵan. Buǵan deıin Grýzııa parlamenti mıtıngiler men sherýlerdegi zań buzýshylyqtar úshin jazany kúsheıtkenin jazǵan edik.