Grýzııa EQYU Tóraǵasynyń bastamalaryn qoldaıdy
ASTANA. Qańtardyń 26-sy. QazAqparat - Grýzııa EQYU Tóraǵasynyń bastamalaryn qoldaıdy jáne onyń júzege asýyna tilektes. Osy pikirdi búgin Grýzııanyń Qazaqstan Respýblıkasyndaǵy Tótenshe jáne Ókiletti elshisi Paata Kalandadze QR Parlamenti Májilisiniń Tóraǵasy Oral Muhamedjanovpen ótken kezdesýinde málim etti,
dep habarlaıdy QazAqparat.
Taraptar áńgime barysynda Qazaqstan memleketiniń Basshysy jarııa etken elimizdiń EQYU-daǵy tóraǵalyǵynyń urany tórt "T" - "trast" (senim), "tradıshn" (dástúr), "transparensı" (ashyqtyq) jáne "tolerans" (tózimdilik) týraly sóz qozǵady. Qazaqstannyń ustanymy EQYU elderi arasynda ǵana emes, barlyq Eýrazııalyq qurlyq boıynsha qarym-qatynasty nyǵaıtýǵa, qaipsizdikti saqtaýǵa óz úlesin qosatyny aıtyldy.
Búgingi tańda Qazaqstannyń bastamalaryn kóptegen elder qoldap otyr. Sonyń ishinde ústimizdegi jyly Astanada shaqyrylyp otyrǵan toleranttyq jónindegi Konferentsııa jáne EQYU-ǵa múshe elder basshylarynyń Sammıti ekeni anyq. Ystambul sammıtinen keıin aradaǵy on jyldan astam ýaqyt boıy qordalanyp qalǵan máseleler boıynsha keńesetin kez kelgeni aıtyldy.
Eki el arasyndaǵy yntymaqtastyqty nyǵaıtý maqsatynda saýda-ekonomıkalyq aınalymdy jaqsartý máselesi sóz boldy. Grýzııa elshisi qarjy daǵdarysy kezinde birde-bir qazaqstandyq kompanııa jumysyn toqtatpaǵanyn málimdedi. «Biz Qazaqstandy senimdi áriptes dep bilemiz»,- dedi.
Májilis Tóraǵasy Qazaqstan men Grýzııa Parlamentteri arasynda dostyq toby jumys istep jatqanyn, zań shyǵarýda tájirıbe almasý úshin dostyq tobynyń qyzmetin jandandyrý, jıi baılanys ornatý qajettigin aıtty. Meıman Májilis Tóraǵasyna grýzııalyq áriptesiniń sálemin jetkizip, óz elderine kelýge shaqyrǵanyn aıtty.
Kezdesýde Májilis Tóraǵasy Grýzııa Elshisin jańa qyzmetke kirisýimen quttyqtap, Qazaqstandaǵy mártebeli qyzmetine tabys tiledi.
