Grýzııa eksporty 19,6 paıyz ósti: munaı ónimderiniń úlesi artty
ASTANA. KAZINFORM — Grýzııanyń 2026 jylǵy qańtar-qyrkúıek aılaryndaǵy taýar eksporty byltyrǵy osy kezeńmen salystyrǵanda 19,6 paıyz ósip, 6,15 mlrd AQSh dollaryna jetti. Bul týraly Kazinform agenttiginiń menshikti tilshisi Grýzııanyń Ulttyq statıstıka qyzmetiniń (Geostat) derekterine silteme jasap habarlaıdy.
Bul rette eksport qurylymynda aıtarlyqtaı ózgeris baıqalady: avtomobıl eksporty shamamen tórtten birge qysqarsa, munaı men munaı ónimderin jetkizý kólemi 12 eseden astam ósken.
Avtomobılder Grýzııanyń basty eksporttyq taýary bolǵanymen, olardyń eksport kólemi 23,7 paıyz qysqaryp, 1,53 mlrd dollar boldy. Nátıjesinde avtomobılderdiń jalpy eksporttaǵy úlesi 2025 jyldyń qańtar-qyrkúıek aılaryndaǵy 38,9 paıyzdan 2026 jyldyń sáıkes kezeńinde 24,9 paıyzǵa deıin tústi.
Sonymen qatar munaı men munaı ónimderiniń eksporty 62,8 mln dollardan 811,8 mln dollarǵa deıin ósti. Olardyń jalpy eksporttaǵy úlesi 1,2 paıyzdan 13,2 paıyzǵa jetti. Al baǵaly metaldar kenderi men kontsentrattarynyń eksporty 68 paıyz ósip, 464 mln dollardy qurasa, mys kenderi men kontsentrattarynyń eksporty eki eseden astam artyp, 163,4 mln dollarǵa jetti.
Grýzııa eksportynyń negizgi baǵyttary da ózgeriske ushyrady. Máselen, 2026 jyldyń qańtar-qyrkúıek aılarynda Qyrǵyzstan 650,2 mln dollarlyq grýzın taýaryn ımporttap, eldiń eń iri eksport naryǵy mártebesin saqtap qaldy. Degenmen, bul kórsetkish ótken jyldyń sáıkes kezeńimen salystyrǵanda 39,8 paıyz azaıdy. Al Qytaı Grýzııadan ımport kólemin 168,7 paıyz arttyryp, 583,1 mln dollar kórsetkishimen ekinshi orynǵa shyqty. Sondaı-aq alǵashqy tórttikke engen Ázerbaıjanǵa 566,7 mln dollardyń, Reseıge 560,2 mln dollardyń taýary jóneltildi.
2026 jyldyń alǵashqy toǵyz aıynda Grýzııanyń syrtqy saýda aınalymy ótken jyldyń sáıkes kezeńimen salystyrǵanda 9,2 paıyzǵa kóbeıip, 20,54 mlrd dollarǵa shyqty. Bul kezeńde ımport kólemi 5,3 paıyz ósip, 14,38 mlrd dollar boldy. Al syrtqy saýda tapshylyǵy 8,23 mlrd dollarǵa jetip, jalpy taýar aınalymynyń 40,1%-yn qurady.
Buǵan deıin Qazaqstan Grýzııaǵa eksport kólemin arttyratynyn habarlaǵan edik.
