Grýzııa eks-prezıdentine qarsy is qozǵaldy
ASTANA.KAZINFORM - Grýzııanyń Bas prokýratýrasy burynǵy prezıdent Mıhaıl Saakashvılı men birneshe oppozıtsııalyq saıasatkerlerge qatysty qylmystyq is qozǵalǵanyn habarlady, dep habarlaıdy Birinshi qoǵamdyq telearna.
Grýzııanyń Bas prokýrory Georgıı Gvarakvıdze arnaıy brıfıngte tergeý organdary – Bas prokýratýra, Memlekettik qaýipsizdik qyzmeti jáne Іshki ister mınıstrligi birlesken tergeý júrgizgenin málimdedi. Osy rette eldiń konstıtýtsııalyq qurylymy men ulttyq qaýipsizdigine qarsy qylmystar anyqtaldy.
- Nátıjesinde Mıhaıl Saakashvılı, Georgıı Vashadze, Nıka Gvaramııa, Nıkanor Melııa, Zýrab Djaparıdze, Elena Hoshtarııa, Mamýka Hazaradze jáne Badrı Djaparıdzege qarsy qylmystyq is qozǵaldy, - dep habarlady Georgıı Gvarakvıdze.
Prokýratýranyń málimetinshe, bul adamdar ózge memleketterdiń dushpandyq áreketine kómektesti, konstıtýtsııalyq qurylym men ulttyq qaýipsizdik negizderine qarsy áreketterdi qarjylandyrdy jáne úkimetti kúshtep qulatýǵa jarııa túrde shaqyrdy degen kúdikke ilindi.
Málimdemede keıbir oppozıtsııa jetekshileri memleket múddesine qaıshy áreket etip, munaımen qamtamasyz etý jáne áskerı kúshter týraly jalǵan aqparatty sheteldik uıymdarǵa jetkizgeni aıtylady. Tergeý anyqtaǵandaı, bul áreketter birneshe eldiń úkimet sheneýnikteri men kásipkerlerin qosa alǵanda, shamamen 300 grýzın azamatyna qarsy sanktsııa qoldanýyna ákep soqty.
Prokýratýra oppozıtsııa jetekshileriniń 2024 jylǵy parlament saılaýynan keıin narazylyq qozǵalysyn radıkaldandyrýǵa tyrysqanyn anyqtady.
Tergeýshilerdiń málimetinshe, Mıhaıl Saakashvılı áleýmettik jelilerde vıdeo málimdemeler arqyly jaqtastaryn kúsh qoldanýǵa jáne úkimet ǵımarattaryn basyp alýǵa shaqyrǵan.
Tergeý málimeti boıynsha, Mıhaıl Saakashvılıge Grýzııa Qylmystyq kodeksiniń 317-baby boıynsha konstıtýtsııalyq qurylymdy kúshtep ózgertýge shaqyrǵany úshin aıyp taǵylyp otyr.
Zýrab Djaparıdze men Georgıı Vashadzege dıversııa jáne shetel memleketine dushpandyq áreketterge kómektesý úshin jaýapkershilik kózdeıtin 318 jáne 319-baptar boıynsha aıyp taǵylyp otyr.
Elena Hoshtarııaǵa 318, 319 jáne 321-baptar boıynsha, al Nıka Gvaramııa, Nıkanor Melııa, Mamýka Hazaradze jáne Badrı Djaparıdzege 318-bap boıynsha aıyp taǵyldy.
Tergeý áli de jalǵasady.
Buǵan deıin Grýzııada eks-prezıdent Saakashvılıdiń partııasyna tyıym salý máselesi qaralǵan edi.