Grýzııa EKPA-daǵy jumysyn toqtatatynyn habarlady
ASTANA.KAZINFORM - Grýzııa mundaı qadamǵa EKPA respýblıka bıligin jańadan parlamenttik saılaý ótkizýge shaqyratyn qarar qabyldaǵannan keıin bardy, dep habarlaıdy 1TV.GE.
Grýzııa delegatsııasynyń basshysy Tea Tsýlýkanı Grýzııaǵa qatysty qabyldanǵan qarardaǵy sharttar men eskertpeler «qabyldanbaıtyn, ádiletsiz jáne negizsiz» ekenin málimdedi.
Onyń aıtýynsha, EKPA-nyń jańa saılaý taǵaıyndaý týraly talaby Grýzııanyń egemendigin buzady jáne 1 mıllıon 120 myńnan astam saılaýshynyń erkin eskermeıdi.
«Bizdiń tarapymyzdan bul eskertpeni qabyldaý bizdiń elektoratymyzǵa jáne qoǵamymyzdyń basym kópshiligine opasyzdyq jasaýmen teń bolar edi... Joǵaryda aıtylǵandardyń negizinde, biz, Strasbýrgtegi Grýzııa parlamenttik delegatsııasynyń músheleri, EKPA-daǵy jumysymyzdy búginnen bastap toqtatamyz», - dedi Tsýlýkanı.
Sonymen birge ol Grýzııanyń Eýropa Keńesiniń múshesi bolyp qala beretinin jáne «ádiletsiz kózqaras ózgerip, bopsalaý toqtaǵan kezde» EKPA-daǵy jumysyn qaıta jalǵastyratynyn atap ótti.
Buǵan deıin EKPA aǵymdaǵy qysqy sessııaǵa bıliktegi «Grýzın armany» partııasy delegatsııasynyń ókilettikterin shektegen bolatyn. Alaıda belgili bir sharttar oryndalsa, sheshim sáýir aıyndaǵy kelesi sessııada qaıta qaralýy múmkin.
Olardyń ishinde jańa parlamenttik saılaý kúnin belgileýmen qatar, saıası tutqyndardy bosatý jáne daýly zańdardy qaıta qaraý (LGBT jáne sheteldik agentter týraly) bar.
Qujatqa 114 depýtat daýys berse, 13-i qarsy boldy.
EKPA EO júıesiniń bóligi emes, Eýropa Keńesiniń konsýltatıvtik organy. Onyń quramyna 46 memleket parlamentteriniń ókilderi kiredi.
2024 jyldyń qańtarynda Ázerbaıjan da eýropalyq organnyń Baký delegatsııasynyń ókilettikterin onymen «yntymaqtasýshylyqtyń bolmaýyna» baılanysty shekteý týraly sheshimine baılanysty EKPA-daǵy jumysyn toqtatty.
Buǵan deıin QazAqparat Strasbýrgte qazaqstandyq senatorlar Qazaqstannyń Eýropa keńesi jáne Parlamenttik assambleıamen áriptestik qarym-qatynasyn damytý, sondaı-aq adam quqyqtaryn qorǵaý, demokratııa men zań ústemdigi máselelerin talqylaǵanyn habarlaǵan bolatyn.
EKPA Alen Berseni (Shveıtsarııa) Eýropa Keńesiniń Bas hatshysy etip bes jyldyq merzimge saılaǵanyn da jazǵanbyz.