Grýzııa demografııalyq daǵdarystyń aldynda tur
ASTANA. QazAqparat - Grýzııa demografııalyq daǵdarystyń az-aq aldynda tur. Arnaıy zertteý júrgizgen BUU ókilderi osyndaı qorytyndyǵa keldi, dep jazady «Habar 24».
Aldyn ala boljam boıynsha Grýzııa halqy 2050 jylǵa qaraı bir mıllıon adamǵa, ıaǵnı 28 paıyzǵa azaıýy múmkin. Sońǵy 4 jyldyń ishinde eldegi bala týý deńgeıi kúrt tómendeýi múmkin.
«2020 jyldan bastap Grýzııada bala týý deńgeıi 2 ese qysqarady. 1980 jáne 1990 jyldar aralyǵynda shamamen 500 myń, al 1990 jáne 2000 jyldar aralyǵynda 245 myń bala týǵan. Sonda 2020 jyldan bastap týatyn analar qatary 2 ese azaıdy degen sóz», - deıdi Demokratııalyq jańarý qorynyń basshysy Tamar Chıbýrdanıdze.
90-jyldardyń basyndaǵy bala týýdyń kemýine Abhazııadaǵy qarýly qaqtyǵys pen táýelsizdik alǵannan keıingi ekonomıkalyq-áleýmettik qıyndyqtar sebep bolǵan. Sarapshylar demografııalyq daǵdarystyń aldyn alý úshin qazirden bastap sharalar qabyldaý qajet dep esepteıdi. Otbasy ınstıtýtyn qoldaýǵa qoǵamdyq belsendiler úles qosyp jatyr. Jergilikti jas fotograftar «Qyz bala dúnıege keldi» degen ataýmen arnaıy kórme uıymdastyrdy. Osylaısha olar túsik jasatýǵa qarsylyq bildirgen. Sebebi grýzın otbasynda uldarǵa artyqshylyq beredi eken. Zertteý nátıjesi kórsetkendeı, bul elde júz qyz balaǵa 110 uldan keledi.
«Bizdiń qor Grýzııa úkimetimen birlesip, demografııalyq ahaýaldy qoldaý boıynsha 11 bastama ázirledi. Olardyń arasynda jalǵyzbasty ata-anaǵa áleýmettik demeý kórsetý, túsik jasatýdy túbirimen joıý jumystary bar. Bul sharalar eptep áser etip keledi. Biraq áli qyrýar sharýa jasalýy kerek», - deıdi Demokratııalyq jańarý qorynyń basshysy Tamar Chıbýrdanıdze.
Grýzııada otbasyn qurý boıynsha alǵashqy jáne ázirge birden-bir ortalyq jumys isteıdi. Osy mekeme jumys istegen 17 jyldyń ishinde júzdegen baqytty otbasy qurylǵan.
Elde qazir bala týý deńgeıi boıynsha Tbılısı alda tur. Ókinishke qaraı, eldiń keıbir aımaqtaryndaǵy demografııalyq ahýal tipten nasharlap ketken. Osyǵan baılanysty 2016 jyldyń jazynan bastap taýly óńirde turatyn kópbalaly otbasylar úshin arnaıy aqshalaı kómek bekitildi.
