Grýzııa bıyl jappaı áskerı drondar shyǵara bastaıdy

TBILISI. QazAqparat – Sáýir aıynda Grýzııada grýzın-polıak óndirisiniń barlaý jáne jaýyngerlikke arnalǵan ushqyshsyz ushaqtarynyń serııalyq óndirisi bastalady. Bul týraly Grýzııanyń Qorǵanys mınıstri Hýansher Býrchýladze málimdedi, dep habarlaıdy QazAqparat tilshisi Agenda.ge saıtyna silteme jasap.

Juma kúni Krtsanısı polıgonynda Grýzııanyń Qorǵanys mınıstrligi jaqynda Delta WB grýzın-polıak qorǵanys kásiporny shyǵarǵan ushqyshsyz ushaqtardyń alǵashqy úlgilerin synaqtan ótkizdi.

Polıak jáne grýzın mamandary FlyEye jáne Warmate drondaryn Premer-Mınıstr Iraklıı Garıbashvılıge kórsetti, dep habarlady eldiń Qorǵanys mınıstrligi.

Grýzııa Qorǵanys mınıstrliginiń málimetinshe, FlyEye barlyq klımattyq aımaqtarda kúrdeli meteorologııalyq jáne radıoelektrondy áskerı jaǵdaıda joǵary dáldiktegi tapsyrmalardy oryndaýǵa arnalǵan jáne artıllerııalyq soqqylardy úılestirý úshin barlaý quraly retinde jasalǵan.

Warmate-ke keletin bolsaq, bul túrli oqtumsyǵy arqyly joǵary dáldikpen nysanaǵa soǵýǵa qabiletti qurylǵysy bar áskerı dron. Ony polıak armııasy, sondaı-aq NATO elderiniń basqa áskerleri paıdalanady.

Delta WB ishki óndiristi kúsheıtý jáne ozyq áskerı tehnıkany jańartý maqsatynda Grýzııada ushqyshsyz ushý apparattaryn qurastyrý boıynsha birlesken kásiporyn retinde quryldy. Kompanııa WB Electronics polıak kompanııasy men Delta grýzın áskerı ǵylymı-tehnıkalyq ortalyǵynyń birlestiginen turady.

Qazirgi ýaqytta kompanııa eki tıpti ushý apparattarynyń qurastyrý jelisine tehnıkalyq qyzmet kórsetýmen aınalysady. Óndirýshilerdiń aıtýynsha, jaqyn arada olar jappaı óndiriske kirisip, jylyna 1500-ge deıin dron shyǵara alady.

Foto: Grýzııa úkimeti ákimshiliginiń baspasóz qyzmeti