Grýzııa BBC-diń «hımııalyq qarý» týraly málimdemelerine qatysty tergeý júrgizip jatyr

ASTANA. KAZINFORM – Grýzııanyń Memlekettik qaýipsizdik qyzmeti (MQQ) BBC-diń Tbılısıdegi sońǵy narazylyq aktsııalary kezinde Birinshi dúnıejúzilik soǵystan qalǵan ýly zat qoldanylǵan bolýy múmkin degen habarlamasynan keıin tergeýdi bastady, dep habarlaıdy eldiń Birinshi qoǵamdyq telearnasy. 

Vedomstvo tergeý BBC reportajyna negiz bolǵan málimdemelerdiń derekkózderin muqııat tekserýge baǵyttalǵanyn atap ótti. 
MQQ málimetinshe, taratylǵan aqparatta azamattardyń ómiri men densaýlyǵyna qaýip tóndiretin jáne memlekettik múddeler men eldiń halyqaralyq bedeline nuqsan keltiretin qylmys belgileri bolýy múmkin.

Tergeý Qylmystyq kodekstiń qyzmettik ókilettigin teris paıdalaný jáne sheteldik uıymnyń dushpandyq áreketterine kómektesý baptary boıynsha júrgizilip jatyr. MQQ barlyq yqtımal boljamdardy tekserip, qoǵamdy onyń qorytyndylary týraly únemi habardar etip otyratynyn atap ótti.

BBC-diń «Grýzııalyq narazylyq bildirýshilerge shashylǵan Birinshi dúnıejúzilik soǵys kezindegi ýly qospa» dep atalatyn materıalynda dárigerler men burynǵy qaýipsizdik kúshterin qosa alǵanda birneshe derekkózdiń pikiri keltirilgen.

Grýzııa bıligi esep qorytyndylaryn «sandyraq» dep atap, polıtsııanyń qatań zań sheńberinde áreket etkenin málimdedi. 

«Grýzın armany» partııasy sonymen qatar eldiń bedelin BBC-diń birnesh ret qaıtalanǵan jalǵan málimdemelerinen qorǵaý úshin halyqaralyq sottarǵa júginý nıetin málimdedi.

Buǵan deıin Grýzııadaǵy tártipsizdikter kezinde 14 polıtseı jaraqat alǵanyn jazǵan bolatynbyz. 

Grýzııada mıtıng uıymdastyrǵandarǵa bılikti qulatýǵa áreket jasady degen aıyp taǵyldy. 

4 qazanda Tbılısıde bolǵan tártipsizdikke qatysqan taǵy segiz adam ustaldy.