Grýzııa azamattarynyń jubaılaryna arnalǵan yqtııarhattyń jańa sanatyn engizedi
ASTANA. KAZINFORM — Bul týraly el parlamentiniń plenarlyq otyrysynda úkimet bastamashy bolǵan «Sheteldikter men azamattyǵy joq adamdardyń quqyqtyq mártebesi týraly» zańǵa túzetýler paketin talqylaý barysynda Іshki ister mınıstriniń orynbasary Aleksandr Darahvelıdze málimdedi, dep habarlaıdy Kazinform agenttiginiń menshikti tilshisi.
Darahvelıdzeniń aıtýynsha, zańnamalyq ózgerister kóshi-qon úderisterin basqarýdy jetildirýge jáne zańsyz kóshi-qonǵa qarsy kúres sharalaryn kúsheıtýge baǵyttalǵan.
Onyń sózinshe, túzetý eń aldymen, oqý jáne turaqty turýǵa yqtııarhat berýdiń qoldanystaǵy tártibin qaıta qaraýdy kózdeıdi. Qazirgi ýaqytta Grýzııada oqý negizindegi turýǵa yqtııarhatty 35 myńnan astam shetel azamaty paıdalanyp otyr. Al Grýzııa azamatymen nekege turý negizinde beriletin turaqty turýǵa yqtııarhatqa shamamen 30 myń adam ıe.
— 2026 jyldyń birinshi toqsanynda osy sanattaǵy turýǵa yqtııarhatqa suranys úsh ese artty. Bul kóshi-qon artyqshylyqtaryn alý úshin jalǵan nekelerdiń qoldanylý qaýpin kórsetýi múmkin, — dedi Aleksandr Darahvelıdze.
Usynylǵan ózgeristerge sáıkes, Grýzııa azamatymen nekege turǵan shetel azamattary endi birden merzimsiz turý mártebesin ala almaıdy. Onyń ornyna Grýzııa azamatynyń jubaıyna arnalǵan arnaıy turýǵa yqtııarhat engiziledi.
Alǵashqy kezeńde bul qujat bir jyl merzimge beriledi, keıin ony eki jylǵa uzartý múmkindigi qarastyrylǵan.
Qujat beriler aldynda shetel azamaty men onyń grýzııalyq jubaıy arnaıy komıssııada áńgimelesýden ótýi tıis. Eger jalǵan neke belgileri anyqtalsa, materıaldar qosymsha tekserý úshin tergeý organdaryna joldanady.
Grýzııa Іshki ister mınıstrliginiń málimetinshe, jalǵan neke — qylmystyq jaýapkershilik kózdelgen quqyq buzýshylyq. Eger nekeniń jalǵan ekeni dáleldense, ol jaramsyz dep tanylyp, kináli tulǵalar zańnamaǵa sáıkes jaýapqa tartylady.
Al tekserý barysynda zań buzýshylyqtar anyqtalmasa, turýǵa yqtııarhat belgilengen tártippen beriledi. Neke bes jyl boıy saqtalǵan jaǵdaıda, shetel azamaty turaqty turýǵa yqtııarhat alýǵa ótinish bere alady.
Úkimettiń pikirinshe, jańa tetikter kóshi-qon baqylaýynyń tıimdiligin arttyrýǵa, kóshi-qon mártebesin alý kezindegi teris paıdalanýdyń aldyn alýǵa jáne el aýmaǵynda shetel azamattarynyń turý negizderin qosymsha tekserýdi qamtamasyz etýge múmkindik beredi.
Buǵan deıin Grýzııa bıligi sheteldikterdiń elde zańdastyrylýy úshin qoldanylatyn jalǵan nekelerge qarsy kúresti kúsheıtip jatqany habarlanǵan bolatyn.
