Grýzııa azamaty 90 myń AQSh dollaryn Atyraý áýejaıyndaǵy kedennen jasyryn ótkizbek bolǵan

ATYRAÝ. KAZINFORM — H.Dospanova atyndaǵy Atyraý halyqaralyq áýejaıynda Grýzııa Respýblıkasynyń azamaty 90 myń AQSh dollaryn kedennen jasyryn ótkizýge tyrysqan. Sheteldik Kýtaısı baǵytyndaǵy áýe reısimen ushpaq bolǵan.

Atyraý oblystyq memlekettik kirister departamenti baspasóz qyzmetiniń málimetinshe, bul derek 11 aqpanda tirkelgen. 

«Eýrazııalyq ekonomıkalyq odaqtyń kedendik shekarasy arqyly «Atyraý-Kýtaısı» baǵytyndaǵy №KS – 7993 halyqaralyq áýe reısine tirkeý kezinde Grýzııa Respýblıkasynyń azamatynyń qol júginde 10 000 AQSh dollary bolǵan. Alaıda, kedendik baqylaýdy júrgizý kezinde shekaralyq baqylaý bólimshesi men Atyraý oblysy boıynsha Ekonomıkalyq tergep-tekserý departamentiniń qyzmetkerlerimen birge sheteldik júgi tekserildiú Sol kezde Grýzııa Respýblıkasy azamatynyń chemodanynan 90 000 (toqsan myń) AQSh dollary mólsherinde kedendik baqylaýdan jasyrylǵan aqshalaı qarajat tabyldy. Sheteldikten alynǵan 100 000 (júz myń) AQSh dollary mólsherindegi aqshalaı qarajat «DHL INTERNEIShNL Qazaqstan» JShS ýaqytsha saqtaı qoımasyna qabyldaý-tapsyrý aktisimen ornalastyryldy», - dep habarlady departamenttiń baspasóz qyzmeti. 

Prezıdenttiń «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» 2022 jylǵy 14 naýryzdaǵy Jarlyǵy bar. Soǵan sáıkes elimizden qolma-qol shetel valıýtasyn jáne (nemese) aqsha quraldaryn 10 000 AQSh dollarynyń balamasynan asatyn jáne Qazaqstan Respýblıkasy Ulttyq Bankiniń kúni belgilengen baǵamy boıynsha eseptelgen somada áketýge tyıym salynady.

Eske sala ketelik, buǵan deıin Atyraýda úsh adamnyń ólimine sebepker bolǵan Túrkııanyń azamaty 5 jylǵa sottalǵanyn jazǵan bolatynbyz.