Grýzııa áýe jelileriniń Reseı aýmaǵyna ushýyna tyıym salyndy
NUR-SULTAN. QazAqparat - Grýzııalyq áýe kompanııalary 8 shildeden bastap Reseı aýmaǵyna ushpaıtyn boldy. Bul jóninde RF Kólik mınıstrliginiń málimdemesinde aıtylǵan, dep habarlaıdy QazAqparat TASS agenttigine silteme jasap.
Kólik mınıstrliginiń saıtynda jazylǵandaı, áýe qatynasynyń toqtaýyna tıisti áýe qaýipsizdigin qamtamasyz etý qajettigi jáne «Áýe qozǵalysyn uıymdastyrý jónindegi memkorporatsııa» FMÝK aldyndaǵy aeronavıgatsııalyq qyzmet úshin qaryzdyń qordalanýy sebep bolǵan. Grýzııanyń aeronavıgatsııalyq qyzmet úshin qaryzynyń jalpy somasy - $793 myń shamasynda. Taǵy 592,2 myń rýbl 2008 jyldan beri tólenbegen.
«Bul tyıym «Georgian Airways jáne MyWay Airlines kompanııalary áýe qaýipsizdigi baǵdarlamasyn, aýdıtyn usynyp, Reseı tarapy kelisim bergenge deıin sozylady. Sondaı-aq, Grýzııa tarapy aeronavıgatsııalyq qyzmet kórsetýge qaryzyn tolyq tóleýi tıis», - delingen habarlamada.
Sonymen birge, Kólik mınıstrligi RF áýe bıliginiń grýzındik áriptesterine konsýltatsııa ótkizýge daıyn ekenin de málim etti.
Esterińizge sala keteıik, juma kúni RF Prezıdenti Vladımır Pýtın juma kúni Grýzııaǵa jolaýshy tasymaldaıtyn áýe qatynasyna ýaqytsha tyıym salatyn Jarlyqqa qol qoıǵan bolatyn. Tyıym 8 shildeden bastap kúshine enedi.
Eske salamyz, 20 maýsym, beısenbi kúni Tbılısıde jappaı narazylyq sharasy bastaldy. Kóterilisshiler Reseı delegatsııasynyń Pravoslavıe parlamentaralyq Bas assambleıasyna qatysýyna narazylyq bildirgen. Delegatsııany basqarýshy jáne ASM basshysy RF memlekettik dýmasynyń depýtaty Sergeı Gavrılovtyń sessııa kezinde Grýzııa parlamenti spıkeriniń kreslosyna otyryp, jınalǵandarǵa orys tilinde sóılegeni oppozıtsııanyń narazylyǵyn týdyrǵan. Grýzııanyń oppozıtsııalyq depýtattary muny qorlaý dep baǵalap, Bas assambleıanyń jumysyn toqtatty.
Sherýshiler Grýzııa ІІM basshysy Georgıı Gaharııa men spıker Iraklıı Kobahıdzeniń otstavkaǵa ketýin, sondaı-aq kezekten tys parlament saılaýy ótkizilýin talap etip, parlament ǵımaratyna birneshe ret shabýyl jasaǵan. Tbılısı polıtsııasy Grýzııa parlamentiniń aldyna jınalǵan kóterilisshilerdi taratý úshin rezeńke oq pen kózdi jasaýratatyn gaz qoldandy.
Grýzııalyq BAQ ókilderi birneshe adamnyń aýyr jaraqat alǵanyn habarlady. Grýzııa densaýlyq saqtaý mınıstrliginiń málimetinshe, barlyǵy 52 adam zardap shekken, onyń 38-i - polıtsııa qyzmetkerleri.
