Grýzııa alty jyldan asqan kólikterdi ımporttaý erejelerin qaıta qarady
ASTANA. KAZINFORM – Grýzııaǵa kólik ımporttaý erejelerine birqatar túzetý engizildi, dep habarlaıd Kazinform agenttiginiń aımaqtaǵy tilshisi Birinshi qoǵamdyq telearnaǵa silteme jasaı otyryp.
Grýzııa úkimeti alty jyldan asqan kólikterdi ımporttaýǵa tolyq tyıym salýdyń ornyna aktsızdik salyq mólsherlemesin arttyrý arqyly retteýdi tańdady.
Premer-mınıstr Iraklıı Kobahıdze úkimet otyrysynda ákimshilik tyıymnyń ornyna aktsızdik salyqtyń ósýi engiziletinin habarlady. Jańa erejege sáıkes, alty jyldan asqan kólikterge kedendik tazartý alymy qozǵaltqysh kóleminiń tekshe santımetrine 4,5 ları (shamamen 725 teńge) mólsherinde belgilenedi. Qazirgi ýaqytta bul salyq tekshe santımetrine 80 tetrı (shamamen 145 teńge) bolyp otyr.
Premer-mınıstr bul sharanyń ekologııalyq saıasat pen aýa sapasyn jaqsartý strategııasynyń bir bóligi ekenin atap ótti. Ol jańa salyqtyq retteý jeke sektor men ekologııalyq talaptar arasyndaǵy tepe-teńdikti qamtamasyz etý maqsatynda engizilgenin aıtty.
– Importqa tolyq tyıym salýdyń ornyna aktsızdik salyqty 4,5 ları deńgeıinde belgileýdi usynamyz. Bul – qorshaǵan ortany qorǵaýǵa baǵyttalǵan mańyzdy qadam. Ózgerister engizý kezinde azamattar men jeke kásipkerlerdiń múddeleri eskerildi, - dedi Iraklıı Kobahıdze.
Aqpan aıynda Grýzııa parlamentine alty jyldan asqan kólikterdi ımporttaýǵa tyıym salý týraly zań jobasy usynylǵan bolatyn.
News Georgia agenttiginiń málimetinshe, jeńil kólikterdi ımporttaý men eksporttaý Grýzııanyń syrtqy saýdasynda jetekshi oryn alady. 2025 jyly el 3,87 mıllıard dollar kóleminde jeńil kólikter ımporttap, bul jalpy ımporttyń 20,9%-yn qurady. Sonymen qatar jeńil kólikterdi qaıta eksporttaý kólemi ótken jyly 16%-ǵa ósip, 2,8 mıllıard dollarǵa jetti, bul Grýzııa eksportynyń 38%-dan astamyn quraıdy.
Eske sala keteıik, budan buryn Grýzııa ımmıgratsııalyq erejelerdi qatańdatatynyn jazǵanbyz.
