Grýzııa 2026 jyly EO granttarynan bas tartty

ASTANA. KAZINFORM — Grýzııa bıligi 2026 jylǵy bıýdjetti josparlaý barysynda Eýroodaq granttarynan taǵy da bas tartýǵa sheshim qabyldady. Bul týraly respýblıkanyń qarjy mınıstriniń birinshi orynbasary Georgıı Kakaýrıdze parlamentte 2026 jylǵy bıýdjet jobasyn tanystyrý kezinde jýrnalısterge jetkizdi, dep habarlaıdy TASS.

«Sizder 2026 jyly da bıýdjet qoldaýyna arnalǵan granttardy kórmeısizder. Biz onymen aınalyspaımyz. Búgingi jaǵdaı boıynsha Eýroodaqtyń túrli vedomstvolarymen granttar tartý baǵytynda jumys júrgizilmeı otyr, sebebi bizdiń jarııalanǵan saıasatymyz — bıýdjet qoldaýyna arnalǵan granttarmen jumys isteýge negizdelmegen», dedi Kakaýrıdze.

Mınıstrdiń birinshi orynbasary EO granttarynan bas tartýǵa qaramastan, Grýzııa qaryz alatynyn atap ótti. Bul qarajat ınfraqurylymdyq jobalardy júzege asyrýǵa jumsalady.

2024 jylǵy 28 qarashada «Grýzııa armany — Demokratııalyq Grýzııa» bıleýshi partııasy EO-men múshelikke kirý jónindegi kelissózderdi ashý máselesin 2028 jylǵa deıin toqtata turý jáne Eýroodaq tarapynan barlyq bıýdjettik granttardan bas tartý týraly sheshim qabyldaǵan edi. Sol kezde Grýzııa premer-mınıstri Iraklıı Kobahıdze Tbılısıdiń EO-ǵa kirý boıynsha óz mindettemelerin tek óz bıýdjetiniń esebinen oryndaýdy jalǵastyrýǵa nıetti ekenin aıtqan.

Eske sala keteıik, jýyrda EO Grýzııany demokratııalyq joldan shegingeni úshin synǵa alǵanyn jazdyq.

Al oǵan deıin Eýropalyq odaqtyń syrtqy ister jáne qaýipsizdik saıasaty jónindegi joǵarǵy ókili Kaıa Kallas seısenbi kúni 2030 jylǵa deıin EO-ǵa jańa memleketterdi qabyldaý «realıstik maqsat» ekenin málimdedi.