Grýzın sharaby jalǵan ónimnen úsh deńgeıli qorǵanyspen qamtamasyz etiledi
ASTANA.KAZINFORM — 2027 jylǵy 1 aqpannan bastap Grýzııada sharapqa tsıfrlyq tańbalaý mindetti bolady. Jańa júıe ónimdi qoldan jasaýdan qorǵaýǵa múmkindik beredi. Al satyp alýshylar sýsynnyń túpnusqalyǵyn smartfon arqyly teksere alady, dep habarlaıdy Newsgeorgia.
Basylymnyń habarlaýynsha, Grýzııanyń Qorshaǵan ortany qorǵaý jáne aýyl sharýashylyǵy mınıstrligi tańbalaýdyń jańa erejelerin bekitken.
Júıe úsh deńgeıli qorǵanysty qamtıdy. Birinshisi – Sharap jónindegi ulttyq agenttiktiń belgisi bar kózge kórinetin tańba. Ekinshisi – arnaıy qurylǵymen oqylatyn jasyryn belgi. Úshinshisi – ónimniń túpnusqalyǵyn tekserýge arnalǵan arnaıy saraptamalyq tańba.
Qorǵanysh belgileri jelimdelgen jerinen ajyratýǵa áreket jasaǵanda búlinetin arnaıy materıaldan jasalady. Bul tańbany basqa bótelkege qaıta japsyrýǵa jol bermeıdi.
Árbir tańbada QR-kod bolady. Onyń kómegimen satyp alýshylar sharaptyń ataýy men sanatyn, óndirýshisin, toptama nómirin bile alady. Sondaı-aq sáıkestik sertıfıkaty men tańbanyń elektrondyq júıedegi mártebesin tekserýge múmkindik bar.
Bul rette japsyrmanyń bolýy ónimniń zańdylyǵyn ózdiginen rastamaıdy. Tańba óndirýshi ony iske qosyp, tıisti sertıfıkatqa tirkegennen keıin ǵana jaramdy bolady.
Jańa talaptar bótelkedegi jáne quıma sharapqa da qoldanylady. Quıma sharap jaǵdaıynda tańbalaý tsısternalar men turaqty ydystarǵa júrgiziledi.
Óndirýshiler qorǵanysh belgilerin alý úshin elektrondyq formatta ótinim bere alady. Sharap jónindegi ulttyq agenttik ótinimderdi eki jumys kúni ishinde qaraıdy. Al qorǵanysh belgilerin berý merzimi bes jumys kúninen aspaıdy.
Bılik tańbalaý qunyn 2027 jylǵy aqpanǵa deıin túpkilikti belgileıdi. Aldyn ala boljam boıynsha, bir bótelkege shamamen 10 tetrı kóleminde tólem belgilenýi múmkin. Shaǵyn sharap óndirýshi sharýashylyqtar úshin jeńildetilgen tarıfter qarastyrý josparlanyp otyr.
Buǵan deıin Grýzııada Ulttyq gastronomııa agenttigi qurylǵany habarlanǵan edi. Onyń mindetteriniń biri – dástúrli ónimderdi qorǵaý. Ásirese materıaldyq emes mádenı mura tizimine engizilgen kvevrı dep atalatyn saz qumyralarda grýzın sharabyn óndirý tehnologııasyn saqtaýǵa basymdyq berilmek.
Aıta ketelik jemis sharaptaryn óndirýge baqylaý kúsheıtilýi múmkin ekendigin jazǵan edik.
