Grýzın saıahatshysy velosıpedpen Vladıvostoktan Óskemenge 8 aıda jetti
ÓSKEMEN. QazAqparat - Grýzın saıahatshysy Nodar Berıdze Vladıvostoktan velosıpedpen jolǵa 2016 jylǵy 17 qazanda shyqqan. Segiz aıda Óskemenge jetti, dep habarlady «QazAqparat» HAA tilshisi.
Oblys ortalyǵynda ol BAQ ókilderimen kezdesti, óz marshrýty jaıynda aıtyp berdi. «Men úshin «Álem joly» velosıpedpen saparym aıasynda Qazaqstanǵa kelý úlken qurmet. Sizdiń elge osymen ekinshi márte kelýim. Ótken jyly Tbılısıden Almatyǵa barǵanmyn. Endi Astanaǵa jol tartpaqpyn. Ókinishke oraı, «EXPO-2017» kórmesiniń ashylýyna úlgermedim. Uıymdastyrýshylar men qatysýshylarǵa memlekettik deńgeıde de, halyqaralyq deńgeıde de erekshe mereke bolsyn dep tileımin», - dedi Berıdze ShQO aqparattyq ortalyǵynda ótken baspasóz máslıhatynda.
Astana arqyly veloshabandoz Ombyǵa, odan ári Máskeýge, Lıssabonǵa, sosyn Tbılısıge barmaq. Jobanyń mıssııasy beıbitshilik men toleranttyqty nasıhattaý. 600 kúnde ol 40 myń shaqyrym júrip ótpek.
Sportshy týrneni 2018 jylǵy 26 mamyrda Grýzııa táýelsizdiginiń 100 jyldyǵy qarsańynda Tbılısıde aıaqtaýdy josparlaýda. Nodar Berıdze kásibı velosıpedshi emes, palýan. Bul «Álem joly» jobasy aıasyndaǵy onyń úshinshi sapary. Joba marshrýty Eýropa men Azııanyń 30 elin qamtıdy. Bul eki jylda 50 myńnan astam shaqyrymdy quraıdy.
