Gretsııadaǵy orman órti: Qazaqstandyq ıahta jolaýshylaryna aıyp taǵyldy

ASTANA. KAZINFORM — Grek prokýratýrasy jeke ıahta bortynda bolǵan segiz qazaqstandyq jolaýshyǵa Saronık aralyndaǵy Gıdradaǵy órtke qatysy bar degen aıyp taǵyp otyr. Bul týraly Grekııanyń jergilikti BAQ-tary jazdy. 

Kámeletke tolmaǵan eki jolaýshyǵa aıyp taǵylǵan joq. Grek bıligi Qazaqstannan kómek surap otyr. Sebebi ıahtany jalǵa alǵan týrıster Grekııadan tergeýge alynbaı turyp, ketip qalǵan. Aıyptaý qorytyndysyna órt ornynda prokýror taǵaıyndaǵan sot-medıtsınalyq saraptamasy kezinde tabylǵan jańa dálelder sebep bolyp otyr. Órt sóndirýshiler jalyn tutanǵan býhtadan otshashý qaldyqtaryn tapqany habarlandy.

Bul rette ıahta kapıtany men birinshi kómekshisi qamaýǵa alyndy, al qalǵan ustalǵan ekıpaj músheleri shekteýlermen kepilge bosatylǵan. Sonymen birge, Pıreı prokýratýrasy Hydra órtine qatysty is boıynsha órtti sóndirý jáne port bıliginiń áreketterine qatysty aldyn ala tergeýdi bastady. ıAhtany jalǵa alýshylardyń órtke qatysy bar degen kúdikke qaramastan Grekııadan ketýine múmkindik bergen kez kelgen aqaýlardy tekserý basty nazarǵa alynǵan. 

Buǵan deıin OCCRP jýrnalıster konsortsıýmy relıkti ormandy qıratyp, otshashýlar atylǵan ıahtada demalyp jatqan jolaýshylardyń tizimin jarııalady. Kúdiktiler qatarynda kásipker Danııar Ábilǵazın men Halyq bankiniń basshysy Úmit Shaıahmetovanyń esimderi bar.

Eske sala keteıik buǵan deıin Grekııanyń Gıdra aralyndaǵy orman órtinen keıin 13 adam qamaýǵa alynǵany týraly jazǵan edik.

Artynsha QR SІM «Ustalǵandardyń arasynda qazaqstandyqtar joq» dep resmı málimdeme jasaǵan bolatyn.