Greta Týnberg Shvetsııaǵa oraldy, al Izraılde segiz belsendi qamaýda

ASTANA. KAZINFORM — Greta Týnberg óz jaqtastaryn Gazadaǵy soǵysty toqtatý jáne gýmanıtarlyq kómekti turaqty jetkizýdi talap etý úshin úkimetke qysymdy kúsheıtýge shaqyrdy, dep habarlaıdy euronews.com. 

Izraılden deportatsııalanǵannan keıin ekobelsendi Greta Týnberg Shvetsııaǵa oraldy. Ol Gaza sektorynyń jaǵalaýyna bet alǵan «Bostandyq flotılııasy» ekspedıtsııasynyń taǵy úsh qatysýshysymen birge elden erikti túrde ketýge kelisim bergen.

Al segiz belsendi, onyń ishinde Frantsııadan Eýroparlament depýtaty Rıma Hassan, Izraılden erikti túrde shyǵý týraly qujattarǵa qol qoıýdan bas tartyp, elde qamaýda qaldy.

9 maýsymǵa qaraǵan túni Izraıldiń teńiz arnaıy jasaǵy «Madlın» kemesin baqylaýyna alyp, ony Ashdod portyna jetkizdi. Kemede bolǵan 12 adam Izraıl bıligi tarapynan ustalyp, birneshe saǵattan keıin deportatsııa úshin Ben-Gýrıon áýejaıyna jetkizildi.

Shvetsııaǵa oralǵannan keıin Týnberg kemeniń ustalýyn — arandatýshylyq, al óziniń ustalýy men elden shyǵýyn — «urlaý» dep atady. Sondaı-aq, Izraılde oǵan dóreki qaraǵanyn aıtyp, qamaýda qalǵan belsendilerdi bosatýǵa shaqyrdy.

Týnbergtiń aıtýynsha, «Bostandyq flotılııasy» Gaza turǵyndaryna gýmanıtarlyq kómekti jetkizip, anklavqa Izraıl tarapynan kórsetiletin shekteýlerge qarsylyq bildirý maqsatynda attanǵan.

— Bul mıssııanyń qanshalyqty qaýipti ekenin jaqsy bildik. Maqsatymyz — Gazaǵa jetip, kómekti taratý boldy, — dedi ol.

Ol belsendilerdiń gýmanıtarlyq kómekti anklavqa jetkizýge jáne «ádiletsiz blokadany» buzýǵa tyrysýdy jalǵastyratynyn aıtty.

Buǵan deıin Izraıldiń qorǵanys mınıstri Israel Kats shved ekobelsendisi bar «Madlın» kemesiniń palestınalyq aýmaq jaǵalaýyna jetýine jol bermeýdi buıyrǵan edi.

Aıta ketelik Izraıl Greta Týnberg jáne Gazaǵa barar jolda ustalǵan basqa belsendilerdi deportatsııalaıtyny týraly jazǵan edik.