Greta Týnberg mekteptegi sońǵy ereýilin ótkizdi
ASTANA. QazAqparat – Shvetsııalyq ekobelsendi Greta Týnberg keshe, 9 maýsymda qorshaǵan ortany qorǵaýǵa arnalǵan mekteptegi sońǵy ereýilin ótkizdi, dep habarlaıdy QazAqparat Deutsche Welle agenttigine silteme jasap.
«Mekteptegi ereýilderdiń 251-shi aptasy. Búgin men mektep bitiremin, sol sebepti klımatty qorǵap ereýilge shyǵa almaımyn. Bul - meniń mekteptegi sońǵy ereýilim», - dep jazdy Týnberg Twitter-de.
Soǵan qaramastan, 20 jastaǵy belsendi juma kúnderi ereýilge shyǵyp turatynyn aıtty, biraq ol endi mekteptegi ereýil bolmaıdy.
«Bizde qolymyzdan kelgenniń bárin istegennen basqa amal joq. Kúres endi bastaldy», - dep atap ótti ol.
2018 jyldyń tamyzynda Shvetsııadaǵy parlament saılaýyna bir apta qalǵanda Greta Týnberg alǵash ret Stokgolmda klımatty qorǵaý aktsııasyna shyqty.
15 jasar oqýshy saıasatkerlerdi Jerdegi temperatýranyń bir jarym gradýstan artyq kóterilýine jol bermeý úshin jedel sharalar qoldanýǵa májbúrlegisi keldi.
Kóp uzamaı Gretany úlgi etken álemdegi basqa da mektep oqýshylary juma kúnderi mekteptegi sabaǵyna barmaı klımatty qorǵaý aktsııasyna qatysa bastady.
Týnberg jahandyq «Juma bolashaq úshin» qozǵalysynyń negizin qalaýshy ári klımat ózgerýiniń saldaryna alańdaıtyn óz býynynyń rýporyna aınaldy.
Ol halyqaralyq konferentsııalarǵa qatysady, sheteldik joǵary shendi qaıratkerlermen jáne halyqaralyq uıym ókilderimen kezdesedi.
«Biz osy naýqandy bastaǵaly kóp nárse ózgerdi. Áli de atqarylar jumys kóp» - dep jazdy belsendi Twitter-de.
Sondaı-aq ol qoǵam qorshaǵan ortaǵa qarym-qatynas turǵysynan áli de durys baǵytta emes ekenin atap ótti.
