Greta Týnberg qaıtadan Gaza sektoryna attandy
ASTANA. KAZINFORM – Shvetsııalyq ekobelsendi 31 tamyz kúni Ispanııanyń Barselonasynan Gaza sektoryna shyǵatyn jańa «kómek flotılııasyna» qatysatynyn rastady, dep habarlaıdy DW.
- Jalpy alǵanda mundaı mıssııa bolmaýy kerek, - dep málimdegen bolatyn ol AFP-ge bergen suhbatynda.
- Alaıda ol memleket pen olardyń halqy tańdaǵan ókilder halyqaralyq quqyqty qorǵap, áskerı qylmystar men genotsıdtiń aldyn alý úshin qajettiniń bárin istep jatqan joq.
Onyń sózinshe, bılik ókilderi ózderiniń zańdyq mindettemelerin oryndap otyrǵan joq, osylaısha olar tek palestındikterdi ǵana emes, búkil adamzatty satyp ketti.
Jańa flotılııany Global Sumud Flotilla toby uıymdastyrdy, olar ózderin táýelsiz uıym dep sanaıdy. «Sumud» arab tilinde tabandy degen maǵyna beredi.
Týnbergtiń sózinshe, qatysýshylar Gaza sektoryna gýmanıtarlyq kómek jetkizip, gýmanıtarlyq dálizdi ashýdy kózdep otyr. Dáliz olarǵa keıin gýmanıtarlyq kómekti keńeıtý úshin qajet.
- Aktsııa Gaza sektoryn zańsyz jáne adamgershilikke jat blokadaǵa alýǵa qarsy baǵyttalǵan, - dedi 22 jastaǵy belsendi.
Eń úlken birlik mıssııasy
Brazılııalyq quqyq qorǵaýshy Tıago Avıla Barselonada jýrnalısterge bunyń osyǵan deıingilermen salystyrǵanda adamdary da, keme sany da kóp, eń iri birlik mıssııasy ekenin aıtty.
Aktsııaǵa qansha keme qatysatyny belgisiz, alaıda oǵan álemniń ózge óńirlerinen de kemeler qosylady. Izraıl osyǵan deıin maýsym jáne shilde aılarynda osyndaı bastamany eki ret toqtatty - áskerı kúshter gýmanıtarlyq júk tıelgen kemelerdi, ekıpajdardy ustap, keıin elden shyǵaryp jiberdi. Maýsym aıynda shvetsııa belsendisi Greta Týnberg te Gazaǵa bet alǵan flotılııaǵa qatysqan, biraq ony Izraıl áskerı-teńiz kúshteri jaǵalaýdan shamamen 185 shaqyrym qashyqtyqta toqtatqan edi. Buǵan deıin de ol birneshe ret Palestınany qoldaý aktsııalaryna qatysqan.
Gýmanıtarlyq daǵdarys
22 tamyzda BUU Gaza sektorynda ashtyq jaılaǵanyn málimdep, Izraıldi gýmanıtarlyq kómek jetkizýge júıeli túrde kedergi keltirdi dep aıyptady. Izraıl bul aıyptaýlardy joqqa shyǵardy.
Álemniń túkpir-túkpirinde 23 aıǵa sozylǵan soǵysty toqtatýǵa shaqyrýlar kúsheıip keledi. Gaza sektoryndaǵy gýmanıtarlyq jaǵdaı áli de kúrdeli kúıinde qalyp otyr.
Qaqtyǵys 2023 jylǵy 7 qazanda palestınalyq HAMAS radıkaldy qozǵalysy men odaqtas toptardyń Izraılge jasaǵan aýqymdy shabýylynan bastalǵan. Ol kezde shamamen 1200 ızraıldik qaza taýyp, 250-ge jýyǵy tutqynǵa alynǵan. Buǵan jaýap retinde Izraıl Gazada keń aýqymdy áskerı operatsııa bastaǵan.
HAMAS bıliginiń dereginshe, qaqtyǵys barysynda 63 myńnan astam adam qaza tapqan, olardyń kópshiligi — beıbit turǵyndar. Bul derekterdi táýelsiz rastaý múmkin emes, alaıda BUU ókilderi olardy shynaıy dep sanaıdy.
Osyǵan deıin Izraıl Greta Týnberg jáne Gazaǵa barar jolda ustalǵan basqa belsendilerdi deportatsııalaıtyny týraly jazdyq.