Grepplıngten alǵashqy Álem kýbogy Astanada ótedi
ASTANA. QazAqparat - Grepplıngten alǵashqy Álem kýbogy Astanada ótedi. Sondaı-aq, ár túrli elderden keletin balýandar irikteýden ótpeı-aq halyqaralyq Asia Open týrnırine qatysa alady. Bul týraly QazAqparat elorda ákimdiginiń resmı saıtyna silteme jasap habarlaıdy.
28-29 shildede Astanada keń aýqymdy shara ótedi. Qazaqstannyń bas qalasynda grepplıngten alǵashqy Álem kýbogy uıymdastyrylady. Іs-sharanyń bastamashysy - QR Grepplıng assotsıatsısy. Álem kýbogyna Reseı, Amerıka Qurama Shtattary, Brazılııa, Qazaqstan sııaqty elderdiń komandalary qatysady dep kútilýde. Kýbok machtyq kezdesý túrinde ótetin bolady. Bir komanda basqa bir komandaǵa qarsy shyǵady.
«Buǵan deıin grepplıngten Álem kýbogyn eshbir el uıymdastyrmaǵan, sol sebepti bul shara biz úshin óte mańyzdy. Qazaqstan - osyndaı formattaǵy jarysty ótkizýge sheshim qabyldaǵan álemdegi alǵashqy el», - dep atap ótti Qazaqstan grepplıng assotsıatsııasynyń prezıdenti Qanat Alın.
Sonymen qatar, dál osy kúnderi halyqaralyq Asia Open týrnıri ótedi. Onyń basty ereksheligi kúresýge nıet bildirgen azamattardyń barlyǵyna jarysqa qatysý múmkindigi beriledi. Búginge deıin sporttyq básekege qatysýǵa Reseı, Ózbekstan, Qyrǵystan, Lıtva, Ýkraına, AQSh sııaqty 500-den astam sportshy ótinish bildiripti. Budan buryn Asia Open uıymdastyrylmaǵan edi. Azııadaǵy grepplıng komıtetinde bul týrnırdiń grepplıngti Azııa kontınentinde ǵana emes, kúlli álemde damytýǵa yqpal etetinin aıtty.
Byltyr Qazaqstan grepplıng assotsıatsııasynyń uıytqy bolýymen elordada kóptegen jarystar ótken bolatyn. Olardyń ishinde Astanada grepplıngten ótken alǵashqy Azııa chempıonaty, jyl saıynǵy Astana Open týrnıri sııaqty balalar men eresekter arasynda ótken halyqaralyq jáne respýblıkalyq jarystar, grepplıngten Qazaqstan birinshiligi men Kýbogy bar. Osy rette Batys, Shyǵys, Soltústik, Ońtústik jáne Ortalyq Qazaqstanda ótetin 5 týrnırden turatyn Qazaq Batyry Championship jarystary da úlken mańyzǵa ıe.
18-19 tamyzda Qazaq Batyry Championship-tiń negizgi kezeńi ótedi. Onyń qorytyndylary boıynsha Astanada ótetin jyldyń eń basty oqıǵasy - 2018 jylǵy Álem chempıonaty dodasynda Qazaqstannyń namysyn qorǵaıtyn balýandar tańdalmaq.
Aıta keteıik, grepplıng - dzıýdo, sambo, djıý-djıtsý, erkin, grek-rım jáne basqa kúrestiń barlyq stılin qamtıtyn jekpe-jektiń túri. Grepplıngtiń artyqshylyǵy - sportshylar eki sektsııa boıynsha kúresedi.
Sportshylardyń salmaǵyn resmı ólsheý rásimi 27 shildede saǵat 18:00-de Turan kóshesi, 4/2 meken-jaıy boıynsha ornalasqan «Dáýlet» sport kesheninde ótedi.
Jekpe-jekter 28-29 shildede saǵat 10.00-de «Dáýlet» SK-de ótedi.
