Grepplıngten álem chempıonatyna elimizden 200-den astam palýan qatysady
ASTANA. QazAqparat - Elorda tórinde grepplıngten álem chempıony ataný úshin 24 eldiń sportshylary baq synaıdy, dep habarlaıdy QazAqparat tilshisi.
Erteń bastalatyn Elordadaǵy aıtýly básekege Qazaqstanmen birge 24 elden barlyǵy 800-den astam sportshy qatysady. Qazaqstannyń namysyn jýyrda Astanada ótken respýblıkalyq chempıonattyń jeńimpazdary qorǵaıdy.
Grepplıngten álem chempıonaty jas erekshelikterine qaraı 13 kategorııa boıynsha ótedi, onyń 8-i - erler, 5-i - áıelder komandasy.
«Sporttyń bul túri elimizde jaqsy qarqynmen damyp keledi. Biz halyqaralyq grepplıng komıtetiniń tarapynan qoldaýǵa ıe boldyq. Odan bólek, kúni keshe ǵana QR Mádenıet jáne sport mınıstrliginde grepplıngti akkredıtatsııadan ótkizdik. Bul atalǵan sport túriniń elimizde odan ári damýyna múmkindik beredi. Álem chempıonatyna kelsek, bizdiń elimizden barlyq sany 200-den asa palýan kúsh synasady. Onyń ishinde úlkender arasynda ulttyq qurama sportshylary óz salmaqtary boıynsha el namysyn qorǵaıdy», - dedi QR Grepplıng qaýymdastyǵynyń prezıdenti Qanat Alın QR Mádenıet jáne sport mınıstrligi alańynda ótken baspasóz máslıhatynda.
Sondaı-aq baspasóz máslıhaty barysynda ótkeli otyrǵan álem chempıonatynyń sımvoly tanystyryldy jáne «Qazag batyry» alǵashqy halyqaralyq sporttyq-analıtıkalyq jýrnalynyń tusaýkeseri ótti.
Grepplıngten álem chempıonaty 6-9 qyrkúıek kúnderi, Astana qalasyndaǵy «Dáýlet» sport kesheninde ótedi.
