Grenlandııada týrısterdi tartý úshin jańa halyqaralyq áýejaı ashyldy
ASTANA. KAZINFORM – Grenlandııanyń «Aısbergter qalasy» atanǵan Ilýlıssat eldi mekeninde jańa halyqaralyq áýejaı jumysyn bastady. Kopengagennen alǵashqy reıspen aralǵa 169 jolaýshy keldi, dep habarlaıdy Associated Press agenttigi.
Jańa áýejaı iri jolaýshylar ushaqtaryn qabyldaýǵa múmkindik beredi jáne araldyń týrıster kóp baratyn aımaqtarynyń birine jetýdi jeńildetedi. Buǵan deıin saıahatshylar bul jerge basqa áýe reısterine aýysyp nemese shaǵyn ushaqtarmen qatynaýǵa májbúr bolǵan.
Áýejaı termınalynyń aýmaǵy – 5 myń sharshy metr, al ushý-qoný jolaǵynyń uzyndyǵy 2,2 shaqyrym. Air Greenland áýe kompanııasy 2027 jyldyń jazǵy týrıstik maýsymynda Kopengagennen aptasyna alty reıske deıin oryndaýdy josparlap otyr. Áýejaıdy Islandııanyń Icelandair kompanııasy da paıdalanbaq.
Jergilikti bılik jańa nysan týrızmdi damytýǵa jáne ekonomıka salalaryn ártaraptandyrýǵa yqpal etedi dep úmittenedi. Qazir aral ekonomıkasy negizinen balyq sharýashylyǵyna táýeldi.
Associated Press málimetinshe, 2024 jyly Grenlandııaǵa 150 myńǵa jýyq týrıst barǵan. Bul 2018 jylmen salystyrǵanda 65 paıyzǵa kóp. Degenmen týrızm araldyń jalpy ishki óniminiń 5 paıyzynan az bóligin quraıdy.
Grenlandııa – Soltústik Amerıka men Eýropanyń arasynda ornalasqan álemdegi eń úlken aral. Munda shamamen 56 myń adam turady. Aral Danııa Koroldiginiń quramyna kiredi, alaıda keń avtonomııaǵa ıe. Sońǵy jyldary Arktıkadaǵy strategııalyq ornyna, tabıǵı resýrstaryna jáne óńirge degen halyqaralyq qyzyǵýshylyqtyń artýyna baılanysty Grenlandııaǵa nazar kúsheıgen.
Sonymen birge jergilikti turǵyndar týrıster sanynyń kóbeıýi ınfraqurylymǵa qosymsha salmaq túsirip, Arktıkanyń názik tabıǵatyna zııan keltirýi múmkin dep alańdaıdy.
Eske sala ketsek, buǵan deıin Grenlandııada qory 13 mlrd barrelge deıin jetýi múmkin munaı ken orny tabylǵany habarlanǵan edi. Grenlandııadaǵy bul qara altyn baılyǵyna AQSh kóz tigip otyr.
