Grenlandııa men Danııanyń Syrtqy ister mınıstrleri AQSh ókilderimen kezdesti
ASTANA. KAZINFORM – AQSh ákimshiliginiń Grenlandııaǵa qatysty qatań málimdemeleri aıasynda Danııa men Grenlandııanyń syrtqy ister mınıstrleri Vashıngtonda AQSh-tyń joǵary laýazymdy ókilderimen kezdesý ótkizdi, dep habarlaıdy Kazinform menshikti tilshisi.
Aqparatqa sáıkes, Aq úıde AQSh vıtse-prezıdenti Djeı Dı Vens pen Memlekettik hatshy Marko Rýbıo Danııanyń Syrtqy ister mınıstri Lars Lokke Rasmýssen jáne Grenlandııanyń syrtqy ister vedomstvosynyń basshysy Vıvıan Mottsfeldtpen kelissóz júrgizgen. Kezdesýde jartylaı avtonomdy aýmaq sanalatyn Grenlandııanyń bolashaǵy talqylanǵan. Alaıda taraptar kelissóz qorytyndysy týraly ázirge resmı málimet bergen joq, dep jazady CBS News.
Buǵan deıin AQSh prezıdenti Donald Tramp strategııalyq mańyzy bar ári paıdaly qazbalarǵa baı Grenlandııa AQSh qaýipsizdigi úshin asa mańyzdy ekenin málimdegen. Onyń aıtýynsha, aral Reseı nemese Qytaıdyń baqylaýyna ótip ketpeýi úshin Amerıka oǵan ıelik etýi tıis.
Tramp áleýmettik jelidegi jazbasynda kezdesýge birneshe saǵat qalǵanda Grenlandııanyń «Altyn kúmbez» dep atalatyn zymyranǵa qarsy qorǵanys júıesi úshin sheshýshi ról atqaratynyn atap ótken.
Al Grenlandııa men Danııa bıligi araldyń satylmaıtynyn, kúsh qoldaný jónindegi málimdemelerdi jaýapsyz dep sanaıtynyn jáne qaýipsizdik máseleleri odaqtastar arasynda sheshilýi tıis ekenin málimdedi. Eýropalyq odaq elderi de bul máselede Danııany qoldady.
Sarapshylardyń pikirinshe, Vashıngtondaǵy kezdesýdiń basty maqsaty – shıelenisti ýshyqtyrmaı, dıplomatııalyq jolmen sheshim tabý. Bul týraly Denipt basylymy habarlaıdy.
Norvegııanyń Oslo qalasyndaǵy Frıtof Nansen ınstıtýtynyń Arktıka jáne teńiz saıasaty jónindegi zertteý dırektory Andreas Osthagenniń aıtýynsha, túpki maqsat – taraptardy qanaǵattandyratyn qandaı da bir ymyraǵa kelý nemese, eń bolmaǵanda, Donald Tramptyń qatań rıtorıkasyn jumsartý.
Danııa men Grenlandııa bastapqyda Marko Rýbıomen kezdesip, NATO aıasyndaǵy eki odaqtas arasyndaǵy daǵdarysty retteý joldaryn talqylaýdy kózdegen.
Sonymen qatar grenlandııalyq basshylardyń ustanymynda ózgeris baıqalady. Buǵan deıin olar Grenlandııanyń táýelsizdikke bet alǵanyn jıi aıtsa, qazir jarııa málimdemelerinde Danııamen birlikti saqtaýǵa kóbirek mán berip otyr.
Grenlandııa premer-mınıstri Iens-Frederık Nılsen qazirgi jaǵdaıda ózin-ózi anyqtaý quqyǵyn táýekelge tigýge bolmaıtynyn atap ótti.
Aıta keteıik, buǵan deıin Kazinform agenttigi Grenlandııanyń AQSh úshin ne sebepti mańyzdy ekeni týraly maqala jarııalaǵan bolatyn.