Grenlandııa men Danııa turǵyndary Trampqa narazylyq bildirdi

ASTANA. KAZINFORM — Grenlandııa men Danııada myńdaǵan adam AQSh prezıdenti Donald Tramptyń Grenlandııany basyp alý josparyna narazylyq bildirip, kóshege shyqty, dep habarlaıdy VVS.

Grenlandııa jáne Danııa úkimettik emes uıymdary uıymdastyrǵan narazylyqtar Danııanyń birqatar qalalarynda, sonyń ishinde Kopengagende jáne Grenlandııanyń astanasy Nýýkta ótti.

— Biz Danııa Koroldigin qurmetteýdi jáne Grenlandııanyń ózin-ózi anyqtaý quqyǵyn talap etemiz, — dedi Grenlandııa qaýymdastyqtaryn biriktiretin Inuit uıymynyń basshysy Kamılla Sızıng.

Tramp buǵan deıin Amerıkanyń ulttyq qaýipsizdigi úshin óte mańyzdy dep esepteıtin Grenlandııany basyp alýdy joqqa shyǵarmaǵan bolatyn jáne senbide ol óziniń josparyna qarsy shyqqan Eýropa elderiniń taýarlaryna baj salyǵyn engizý týraly aıtty.

AQSh prezıdenti Danııa, Norvegııa, Shvetsııa, Frantsııa, Germanııa, Ulybrıtanııa, Nıderlandy jáne Fınlıandııadan keletin taýarlarǵa 1 aqpannan bastap AQSh-qa 10 paıyzdyq baj salyǵy salynady dep málimdedi.

Ol 1 maýsymda tarıfter 25%-ǵa deıin kóteriledi jáne Amerıka Qurama Shtattarynyń «Grenlandııany tolyq jáne absolıýtti ıemdenýi» týraly kelisimge qol jetkizilgenge deıin kúshinde qalady dep qorqytty.

Kopengagendegi narazylyq sherýinde halyq qolyna «Grenlandııadan qolyńdy tart», «ıAnkı, úıińe qaıt!» jáne «Grenlandııa satylmaıdy» degen plakattar ustap shyqty.

— Biz dat bolsaq ta jáne Danııada tursaq ta yntymaqtamyz. Biz yntymaqtastyqty sezinemiz jáne osy jaǵdaıǵa qatty ashýlanamyz. Amerıka prezıdentiniń mundaı ıdeıalardy iske asyrýy bárimizdi tań qaldyrdy, — dedi Kopengagendegi narazylyq aktsııasyna kelgen dat rejısseri Sharlotta Saks Bostrýp.

Grenland saıasatkeri Erık Iensen Reuters agenttigine: «Bizge birtutas bolyp, Grenlandııanyń satylmaıtynyn jáne AQSh-tyń bir bóligi bolǵymyz kelmeıtinin jáne AQSh-tyń anneksııalanýyn qalamaıtynymyzdy kórsetý óte mańyzdy», — dedi.

Grenlandııanyń premer-mınıstri Iens-Frederık Nılsen Nýýk qalasynda AQSh konsýldyǵyna bet alǵan kezde «Grenlandııa satylmaıdy» jáne «Biz óz bolashaǵymyzdy ózimiz anyqtaımyz» degen jazýlar bar ereýilge qosyldy.

— Biz alańdaýlymyz jáne osynda ózimiz ǵana ómir súrgimiz keledi, — dedi Nýýktaǵy narazylyq aktsııasyna kelgen Alan Amstrýp.

Áleýmettik saýalnamalar Grenlandııa turǵyndarynyń 85%-y terrıtorııanyń AQSh-qa qosylýyna qarsy ekenin kórsetti.

Buǵan deıin AQSh Grenlandııaǵa baılanysty Eýropa elderiniń taýarlaryna baj salyǵyn engizetini týraly jazdyq.