Grenlandııa daýy: Danııa AQSh-pen beıbit kelisimge úmittenedi
ASTANA. KAZINFORM – Danııa premer-mınıstri Mette Frederıksen Arktıka men Grenlandııaǵa qatysty máseleler boıynsha Danııa men AQSh beıbit yntymaqtastyq arqyly ortaq sheshimge kele alady dep úmit bildirdi. Bul týraly Xinhua agenttigi jazdy.
Frederıksen bul týraly Fınlıandııanyń soltústigindegi Rovanıemı qalasynda ótken Eýropalyq Arktıka sammıtinen keıingi baspasóz máslıhatynda málimdedi.
Onyń aıtýynsha, Grenlandııaǵa qysym kúsheıip otyr. Premer Eýropadaǵy seriktesterine kúshti qoldaýy úshin alǵys bildirdi.
Frederıksen Danııanyń AQSh-pen qaýipsizdik pen qorǵanys salasyndaǵy, sonyń ishinde Grenlandııadaǵy yntymaqtastyqty nyǵaıtqysy keletinin aıtty. Grenlandııa máselesi boıynsha joǵary deńgeıdegi jumys toby óz jumysyn jalǵastyryp jatyr. Sondyqtan ázirge naqty qorytyndy jasaýǵa erte bolǵanymen, premer alǵa jyljý múmkindigine optımıstik kózqarasta.
– Árıne, bizdiń úmitimiz – beıbit yntymaqtastyq arqyly ortaq sheshimge kelý, – dedi Frederıksen.
Arktıkadaǵy qaýipsizdik máselesine toqtalǵan ol Grenlandııada birneshe odaqtas eldiń birlesken áskerı jattyǵýlar ótkizip jatqanyn atap ótti. Onyń aıtýynsha, Eýropa jáne transatlantıkalyq seriktester Grenlandııa men jalpy Arktıka aımaǵynyń qaýipsizdigine ujymdyq túrde kóbirek jaýapkershilik alyp keledi.
13–14 qyrkúıekte ótken sammıttiń maqsaty – óńirdiń geosaıası mańyzy artyp otyrǵan jaǵdaıda Eýropalyq odaqtyń Arktıkaǵa qatysty ortaq strategııalyq ustanymyn nyǵaıtý.
Grenlandııa – Danııa Koroldiginiń quramyndaǵy ózin-ózi basqaratyn aýmaq. Donald Tramp 2025 jyly Aq úıge qaıta oralǵannan beri araldy AQSh baqylaýyna alýǵa nıetti ekenin birneshe ret málimdegen. Bul Danııamen jáne basqa da eýropalyq odaqtastarmen qarym-qatynasty ýshyqtyrdy.
Aıta keteıik, sońǵy ret Tramp AQSh Grenlandııany baqylaýǵa alýy tıis ekenin shilde aıynda málimdegen.
Al onyń aldynda Tramp Grenlandııadan keıin Úndi muhıtyndaǵy Chagos araldaryn satyp alǵysy keletinin aıtqan.
