«Gremmı» syılyǵynyń eki márte ıegeri Ýolter Afanaseff Túrkistanǵa keldi
TÚRKІSTAN. KAZINFORM — Belgili amerıkalyq kompozıtor jáne ári prodıýser, «Gremmı» syılyǵynyń eki márte laýreaty Ýolter Afanaseff Qazaqstanǵa alǵash ret kelip, Túrkistan qalasyndaǵy Dımash Qudaıbergen men Hunan Broadcasting System halyqaralyq jobasyna qatysty. Bul týraly «Kazakh Tourism UK» AQ baspasóz qyzmeti málim etti.
San ǵasyrlyq tarıhtan syr shertetin Qazaqstannyń rýhanı astanasy «Voice Beyond Horizon» dep atalatyn mýzykalyq baǵdarlamanyń alǵashqy túsirilim ornyna aınaldy. Túsirilim óńirdiń týrıstik jáne tarıhı nysandarynda ótti.
Mýzykalyq joba Qytaı, Qazaqstan, Qyrǵyzstan, Italııa, Malaızııa jáne Serbııa elderinen kelgen oryndaýshylardy biriktirdi. Baıqaýǵa qatysýshylardyń kásibı deńgeıin arnaıy shaqyrylǵan halyqaralyq sarapshylar baǵalady. Qazylar alqasynyń músheleriniń biri — «Tıtanık» fılminde oryndalǵan belgili «My Heart Will Go On» ániniń prodıýseri Ýolter Afanaseff.
— Men Qazaqstanǵa alǵash ret keldim. Bul týraly kóp jyldan beri armandadym. Alǵan áserim men sezimim erekshe: osynda turyp, ómir súrgiń keledi. Adamdary, taǵamy, klımaty, tabıǵaty — barlyǵy meni tánti etip, jan dúnıeme áser etti. Shynymdy aıtsam, bul — ózim bolǵan eń súıikti qalalardyń biri, — dedi Ýolter Afanaseff.
Túsirilim barysynda mýzykanttar Túrkistan oblysynyń tabıǵı jáne mádenı nysandaryn aralady. Olardyń qatarynda Áziret Sultan kesheni, Otyrar qalashyǵy, Karavansaray týrıstik kesheni men etnoaýyl bar.
Mýzykalyq jobaǵa qatysýshylardyń shyǵarmashylyq saıahaty poıyzben elimizdiń basqa óńirlerinde jalǵasady. Túsirilimder Mańǵystaý, Almaty jáne Aqmola oblystarynda, sondaı-aq Almaty men Astana qalalarynda ótedi.
Shoýdyń fınaldyq kezeńi Qazaqstan astanasynda josparlanǵan. Atap ótken jón, Dımash Qudaıbergen bul jobany Hunan Broadcasting System arnasymen birlese júzege asyrýda. Atalǵan arnany efır men Mango TV tsıfrlyq platformasy arqyly kún saıyn 210 mıllıonnan astam kórermen tamashalaıdy.
Osy jobanyń arqasynda búkil álem kórermenderi Qazaqstannyń týrıstik áleýetimen tanysatyn bolady. Jobaǵa Qazaqstan Respýblıkasynyń Týrızm jáne sport mınıstrligi, QR Mádenıet jáne aqparat mınıstrligi, Kazakh Tourism ulttyq kompanııasy, «Jolaýshylar tasymaly» AQ jáne óńirlik ákimdikter uıymdastyrýshylyq qoldaý kórsetti.
Eske sala keteıik, buǵan deıin «Gremmı» syılyǵyna jańa nomınatsııalar qosylyp, erejeler jańartylǵanyn jazǵan edik.