GREKO ókili Qazaqstanda qylmys jasasa eshqandaı ımmýnıtetter qoldanylmaıdy
NUR-SULTAN. QazAqparat – Búgin Parlament Senatynyń jalpy otyrysynda «Qazaqstan men Eýropa Keńesi arasyndaǵy Sybaılas jemqorlyqqa qarsy memleketter toby ókilderiniń jáne baǵalaýshy toptar músheleriniń (GREKO) artyqshylyqtary men ımmýnıtetterine qatysty kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Atalǵan kelisimge Strasbýrg qalasynda 2019 jylǵy 15 qazanda qol qoıyldy.
Engizilip otyrǵan zań jobasy baǵalaýdy daıyndaý men júrgizýge baılanysty fýnktsııalardy oryndaý barysynda GREKO músheleriniń ókilderi men baǵalaý toptarynyń músheleri mynadaı artyqshylyqtar men ımmýnıtetterdi paıdalanady:
Birinshiden, jeke basyn qamaýdan nemese ustaýdan ımmýnıtetti, sondaı-aq aıtqandary men jazǵandaryna jáne resmı túrde ózi jasaǵan barlyq áreketterge qatysty qylmystyq, azamattyq, ákimshilik quzyretine ımmýnıtetti paıdalanady.
Ekinshiden, eger bul memlekettik qaýipsizdik maqsatynda kirýge tyıym salynatyn nemese retteletin aımaqtar týraly qaǵıdalarǵa qaıshy kelmegen jaǵdaıda, olardyń fýnktsııalaryn oryndaý úshin memlekettiń aýmaǵynda júrip-turý erkindigin, onyń aýmaǵyna kirýin jáne memleketten shyǵýy qamtamasyz etilýge tıis. Biraq, aıta ketetin jaıt, kórsetilgen tulǵalar qylmys jasaǵan kezinde nemese birden jasalǵannan keıin ustalǵan jaǵdaıda ol qamaýǵa alýdan jáne sot qýdalaýynan bosatylmaıdy.
«Taǵy bir mańyzdy másele – atalǵan ımmýnıtetter tek resmı tulǵa, ıaǵnı Eýropa Keńesiniń resmı ókili retinde jasaǵan áreketterdi kózdeıdi. Eger GREKO-nyń ókili Qazaqstanda júrip jeke tulǵa retinde kez kelgen qylmys jasaǵan jaǵdaıda eshqandaı ımmýnıtetter qoldanylmaıdy. Kináli tulǵa jaýapqa tartylatyn bolady. Sonymen qatar, eger berilgen ımmýnıtter sot tóreligin júzege asyrýǵa kedergi keltiretin bolsa, atalǵan ımmýnıtetterden bas tartý protsedýrasy kózdelgen. GREKO-ǵa qosylý eýropalyq elderdiń tájirıbesine negizdelgen. GREKO-nyń usynystary arqyly ulttyq sybaılas jemqorlyqqa qarsy zańnamany jetildirýge, múshe elderdiń quzyretti organdarymen tıimdi yntymaqtastyqty damytýǵa yqpal etedi», - dedi QR Sybaılas jemqorlyqqa qarsy is-qımyl agenttigi tóraǵasynyń birinshi orynbasary Oljas Bektenov,
Onyń sózine qaraǵanda, GREKO-ǵa qosylý Eýropa Keńesiniń sybaılas jemqorlyq úshin qylmystyq jaýapkershilik týraly konventsııasyn ratıfıkatsııalaýǵa jol ashady. Bul óz kezeginde qylmyskerlerdi ekstradıtsııalaý, olardyń zańsyz tapqan múlkin qaıtarý máseleleri boıynsha Eýropa elderimen yntymaqtastyqty kúsheıtýge múmkindik beredi.
