Grekııanyń kólik mınıstri temirjol apatynan keıin otstavkaǵa ketetinin aıtty

AFINA. TASS – QazAqparat - Grekııanyń ınfraqurylym jáne kólik mınıstri Kostas Karamanlıs Larısa qalasynyń mańyndaǵy jolaýshylar poıyzynyń apatynan keıin otstavkaǵa ótinish berdi.

Apat saldarynan kemi 40 adam mert boldy, dep habarlaıdy QazAqparat reseılik TASS agenttigine silteme jasap.

ERT1 grek telearnasynyń habarlaýynsha, Kostas Karamanlıs otstavkaǵa ketetinin málimdeı kele, óz áreketin apattan qaıtys bolǵan jandardyń rýhyna kórsetilgen azdaǵan qurmet belgisi dep sanaıtynyn aıtty.

«Men qaıǵyly oqıǵa ornynan jańa ǵana oraldym, óte aýyr. Bul grek temirjolynyyń HHІ ǵasyr talabyna sáıkes kelmeıtiginiń faktisi. 3,5 jyl ishinde biz jaǵdaıdy jaqsartýǵa bar kúshimizdi saldyq. Ókinishke qaraı, mundaı apattyń aldyn alý úshin jumsalǵan kúsh jetkiliksiz boldy. Bul bárimiz úshin jáne men úshin aýyr jaǵdaı», - dedi ol.

Mınıstrdiń málimdeýinshe, aýyr qaıǵyly oqıǵadan keıin, túk bolmaǵandaı odan ári ómir súrý múmkin emes.

«Meniń saıasatqa kelgenime kóp ýaqyt bolǵan joq. Biraq el azamattarynyń saıası júıege senimi demokratııanyń qajetti elementi dep sanaımyn. Bul saıası jaýapkershilik dep atalady. Osy sebepti men ınfraqurylym jáne kólik mınıstri qyzmetinen ketemin. Men muny ádiletsiz baqul bolǵan jandardyń rýhyna qurmet kórsetýdiń mınımaldy belgisi dep sanaımyn. Grek memleketi men saıası júıesiniń sheksiz qatelikteri úshin jaýapkershilikti moınyma alý meniń mindetim. Qaza tapqandardyń otbasy men jaqyndarynyń qaıǵysyna ortaqpyn», - deıdi Kostas Karamanlıs.

Buǵan deıin Grekııada poıyzdar soqtyǵysyp, 32 adam mert bolǵany týraly habarlaǵan edik.

Qazir oqıǵanyń jaı-japsary tergelip jatyr.

«Birneshe vagon relsten shyǵyp ketip, tórteýi órtengen. «1 jáne 2-vagon joq. Poıyzdar qatty soǵylǵandyqtan olar joldan ushyp ketken», - dep habarlady Fessalııa provıntsııasynyń gýbernatory Kostas Agorastos ERT memlekettik telearnasyna.