Grekııanyń birinshi hanymy qazaqtyń ulttyq taǵamdaryna joǵary baǵa berdi

ASTANA. QazAqparat - 21 mamyrda Afınada «LAASA» áıelder dıplomatııalyq klýbynyń uıymdastyrýymen besinshi ret álem halyqtarynyń ulttyq taǵamdary halyqaralyq festıval ótti. Bul týraly QR Syrtqy ister mınıstrliginiń baspasóz qyzmeti habarlady.

Atalǵan sharaǵa 33 memleket  qatysty. Ulttyq nyshandarmen áspettelgen qazaq dastarhany festıval qonaqtary men kelýshilerdiń zor qyzyǵýshylyǵyn týdyrdy. Dastarhan basyna qoldan jasalǵan baýyrsaq, irimshik, samsa, chak-chak jáne basqa da otandyq tátti ónimder qoıyldy.  

Qazaqstandyq stendke bet burǵan kóp qonaqtar qatarynda  Grek Respýblıkasynyń birinshi hanymy Vlassııa Pavlopýlos-Peltsemı de boldy. Ol qazaq ulttyq taǵamdaryna joǵary baǵa berdi.

Sonymen qatar halyqaralyq festıval aıasynda álem halyqtarynyń ónerin kórsetetin shara uıymdastyryldy. Qazaqstan atynan elshilik dıplomaty Abzal Imanqulov qazaqtyń ulttyq dombyrasymen óner kórsetti.

Sharadan túsken qarajat qaıyrymdylyq qorǵa jumsaldy.