Grekııanyń taýlarynda qar kóshkini júrip, tórt adam mert boldy
ASTANA. KAZINFORM — Grekııalyq qutqarýshylar Vardýsııa taýlarynda qar kóshkini astynda qalǵan 4 adamnyń denesin tapty, dep habarlaıdy Report.
Afınadan kelip, Vardýsııa jotasyna shyǵýǵa árekettengen úsh alpınısti izdeý aıaqtaldy. Olardyń denesi qar astynan tabyldy. Olardyń qatarynda alpınısterdiń biriniń áıeli bolǵan.
Úsh alpınıstpen baılanys 25 jeltoqsanda úzildi. Keń aýqymdy izdestirý operatsııasy dereý bastalyp, olardyń kóligi taýǵa órmeleýdi bastaǵan tus — Afanasıos Dıakos aımaǵynan tabyldy.
Artynsha qutqarýshylar qar kóshkininiń astynda qalyp ketken joǵalǵan adamdardyń izderin tapty. Qar astynan alpınısterdi izdeý úshin teplovızorlar men drondar paıdalanyldy.
Eske sala keteıik, buǵan deıin Nepaldyń soltústik-shyǵysyndaǵy Gımalaı shyńynda qar kóshkini kezinde 7 alpınıst, onyń ishinde bes sheteldik jáne eki nepaldyq azamat qaza tapty.
Sondaı-aq reseılik alpınıst Natalıa Nagovıtsyna synǵan aıaǵymen 7 myń metrden astam bıiktikte 20 kún boıy kómek kútýmen bolǵan. Qyrkúıek aıynyń basynda Qyrǵyzstannyń alpınızm jáne sporttyq quzǵa órmeleý federatsııasynyń prezıdenti Edýard Kýbatov reseılik alpınıstiń qaza tapqanyn rastady.