Grekııanyń premer-mınıstri salyqty jappaı qysqartý týraly habarlady

ASTANA. KAZINFORM – Grekııa premer-mınıstri Kırıakos Mıtsotakıs ekonomıkalyq kórmeniń ashylýynda salyq jeńildikterin jarııalady. Úkimet josparlanǵan sharalarǵa shamamen 1,7 mıllıard eýro jumsaýdy josparlap otyr, dep habarlaıdy DW. 

– Kóptegen jylǵa sozylǵan qarjylyq daǵdarystan keıin el turaqtylyqqa qol jetkizdi, - dedi Kırıakos Mıtsotakıs. 

Mıtsotakıs jumyssyzdyqtyń 8%-ǵa deıin tómendegenin, ınvestıtsııanyń ósýi men bıýdjet tapshylyǵynyń azaıǵanyn atap ótip, bul eldiń «Eýropadaǵy ekonomıkalyq ósý qarqynynyń eń joǵarylarynyń biri» ekenin aıtty. Osyǵan baılanysty ol salyq jeńildikterin jarııalady: balaly otbasylar bolashaqta tabys salyǵyn aıtarlyqtaı az tóleıdi, al kóp jaǵdaıda ony múldem tólemeıdi. Tabysy 20 000 eýroǵa deıingi 25 jasqa deıingi jastar tabys salyǵynan tolyǵymen bosatylady. 

– Biz salyqty azaıtyp, áleýmettik shyǵyndardy kóbeıtip jatyrmyz, - dedi saıasatker. 

Tómen salyqtar men maqsatty ınvestıtsııalardyń paıdasyn jalǵa alýshylar, shaǵyn aýyldar men aral aımaqtarynyń turǵyndary sezinedi dep kútilip otyr. Bul sharalar arqyly úkimet ómir súrý qunynyń ósýi, turǵyn úı naryǵyndaǵy shıelenis jáne joǵary bilikti jastardyń ketýi sııaqty máselelerdi sheshkisi keledi. 

2010 jyldan beri Grekııa bankrottyq pen eýroaımaqtan shyǵýdyń aldynda tur jáne daǵdarystan tek halyqaralyq kredıtorlardyń qarjylyq kómeginiń arqasynda aman qaldy.

Eske sala keteıik, buǵan deıin Grekııada demografııalyq daǵdarysqa baılanysty 721 mektep jabylatynyn jazǵan edik.