Grekııanyń premer-mınıstri elde salyqtyń qysqartylatyny týraly málimdedi

ASTANA. KAZINFORM – Kóp jyldyq qarjylyq daǵdarystan keıin el turaqtylyqqa qol jetkizdi, dep habarlady Grekııa úkimetiniń basshysy Kırıakos Mıtsotakıs ekonomıkalyq kórmeniń ashylýynda. Ol sondaı-aq salyq jeńildikteri týraly jarııalady, dep habarlaıdy DW. 

Úkimet josparlanǵan sharalarǵa shamamen 1,7 mlrd eýro jumsamaq. 

Mıtsotakıs jumyssyzdyq deńgeıiniń 8%-ǵa deıin tómendeýin, ınvestıtsııanyń ósýin jáne bıýdjet tapshylyǵynyń azaıǵanyn atap ótti. 

Onyń aıtýynsha, bul el «Eýropadaǵy eń joǵary ekonomıkalyq ósý qarqynynyń birine ıe». Osyǵan baılanysty Mıtsotakıs salyq jeńildikteri týraly jarııalady: balaly otbasylar bolashaqta tabys salyǵyn aıtarlyqtaı az tóleıtin bolady, al kóp jaǵdaıda múlde tólemeıdi. 20 myń eýroǵa deıin tabys tabatyn 25 jasqa deıingi jastar tabys salyǵynan tolyǵymen bosatylady.

— Biz salyqty azaıtyp, áleýmettik shyǵyndardy kóbeıtip jatyrmyz, — dedi saıasatker. 

Tómen salyq pen maqsatty ınvestıtsııalardyń paıdasyn jalǵa alýshylar, shaǵyn aýyldar men aral aımaqtarynyń turǵyndary sezinedi dep kútilip otyr. Úkimet bul sharalar arqyly kúnkóristiń qymbattaýy, turǵyn úı naryǵyndaǵy shıelenis jáne joǵary bilikti jastardyń ketýi sııaqty máselelerdi sheshkisi keledi.

2010 jyldan beri Grekııa bankrottyq pen eýroaımaqtan shyǵýdyń aldynda turǵan jáne daǵdarysty tek halyqaralyq kredıtorlardyń qarjylyq kómeginiń arqasynda eńserdi.

Buǵan deıin Grekııa araldaryndaǵy krýızdik sapardyń baǵasy óskenin habarlaǵan bolatynbyz.