Grekııanyń burynǵy premer-mınıstri Tsıpras jańa partııa qurdy
ASTANA. KAZINFORM — Grekııanyń burynǵy premer-mınıstri Aleksıs Tsıpras 2027 jylǵy parlamenttik saılaýǵa birneshe aı qalǵanda «Grekııanyń solshyl alıansy» degen jańa partııanyń qurylǵanyn jarııalady, dep habarlady TASS.
Tsıpras azamattardyń basym bóligine qaıtadan ún berý jolyndaǵy alǵashqy qadam jasalyp otyrǵanyn aıtty.
— Biz ádiletsizdik pen óreskel teńsizdik aldynda únsiz qalǵymyz kelmeıdi, sondyqtan jaqsy álem qurý jolyndaǵy kúsh-jigerdiń bir bóligi bolǵymyz keledi, — dedi ol.
Onyń aıtýynsha, partııanyń maqsaty — eldi demokratııalyq ári áleýmettik turǵydan jańǵyrtý.
Partııa deklaratsııasynda jańa saıası kúshtiń 7 qaǵıdaty kórsetilgen:
- qadir-qasıetpen ómir súrý;
- saıasatkerlerge ımmýnıtetsiz kúshti demokratııa;
- ádil damý men abyroıǵa negizdelgen qýatty ekonomıka;
- adam quqyqtaryn qorǵaıtyn áleýmettik memleket;
- turaqty daǵdarystar jaǵdaıyndaǵy ornyqty Grekııa;
- tsıfrlyq demokratııa men egemendik;
- óz quqyqtaryn qorǵaı otyryp, beıbitshilik kópirlerin quratyn myqty Grekııa.
Aleksıs Tsıpras syrtqy saıasat baǵdarlamasynyń egjeı-tegjeıin ashyp aıtpaǵanymen, partııasy kúshtiniń quqyǵyn emes, halyqaralyq quqyqty moıyndaıtynyn atap ótti.
— Sondyqtan biz Kıprge zańsyz basyp kirý men okkýpatsııaǵa da, araldy is júzinde bólý josparlaryna da eshqashan kelispeımiz, — dedi ol.
Sondaı-aq Tsıpras qazirgi grek úkimetin synǵa aldy. Onyń aıtýynsha, eldi bankrotqa ushyratqandar qaıtadan bılikke kelgen.
— Qarqyndy geosaıası ózgerister kezeńinde Grekııaǵa beıbitshilik pen turaqtylyq tiregi retindegi rólin kúsheıtetin jańa ulttyq baǵdar men belsendi kópjaqty syrtqy saıasat qajet, — dedi eks-premer.
Aleksıs Tsıpras 2015–2019 jyldary Grekııanyń premer-mınıstri boldy. Onyń úkimeti kezinde el halyqaralyq qarjylyq kómek baǵdarlamalarynan shyqty. 2019 jyly SIRIZA partııasy parlament saılaýynda jeńilip, bılikke ońshyl-ortalyq «Jańa demokratııa» partııasy keldi. Onyń jetekshisi Kırıakos Mıtsotakıs premer-mınıstr bolyp taǵaıyndaldy.
26 mamyrda jarııalanǵan qoǵamdyq pikir saýalnamasyna sáıkes, Tsıprastyń jańa partııasy saılaýshylar qoldaýy boıynsha 12,8% kórsetkishpen ekinshi orynǵa shyǵýy múmkin. Al «Jańa demokratııa» partııasynyń reıtıngi 26,1% deńgeıinde baǵalanǵan. PASOK úshinshi orynǵa túsýi yqtımal, al SIRIZA men «Jańa solshyldar» partııalary parlamentke ótpeýi de múmkin.
Aıta keteıik, Grekııa atom energııasyn óndirýi múmkin.
