Grekııanyń birneshe aımaǵynda orman órti tutandy
ASTANA. KAZINFORM — Grekııada Leros jáne Evbeıa araldary, sondaı-aq Kardıtsa okrýgin sharpyǵan orman órtterin sóndirý jumystary jalǵasyp jatyr. Tilsiz jaýmen kúreske jerústi qyzmetteri men avıatsııa jumyldyryldy, dep habarlaıdy Anadolu.
Órt Leros jáne Evbeıa araldarynda, sondaı-aq Kardıtsa okrýginde áli de órship tur.
Grek BAQ-tarynyń málimetinshe, Egeı teńizindegi Leros aralynda órt qaldyqtardy jınaý polıgony aýmaǵynda bastalǵan. Jalyn butaly alqaptarǵa tez taralǵandyqtan, ony sóndirýge órt sóndirýshiler men avıatsııa tartyldy.
Qutqarýshylar tobyn kúsheıtý úshin Leros aralyna qosymsha Kos jáne Samos araldarynan kúshter jiberildi.
Sondaı-aq Evbeıa aralyndaǵy Polıtıka aýdanynda taǵy bir orman órti tirkeldi. Al Kardıtsa okrýginiń Sofades aýdanynda jalyn aýyl sharýashylyǵy alqaptaryn sharpydy.
Qazirgi ýaqytta barlyq óńirde órtti sóndirý jumystary jerústi tehnıkasy men avıatsııanyń kómegimen jalǵasyp jatyr.
Aıta keteıik, Túrkııada orman órti órship tur. Mýgla provıntsııasynyń Mılas aýdanynda bastalǵan orman órti baqylaýǵa alyndy. Órt jerden de, áýeden de sóndirilip jatyr.
