Grekııanyń áýe keńistigi ýaqytsha jabyq, ondaǵan reıs ýaqytynan keshiktirildi

ASTANA. KAZINFORM - Jeksenbi kúni tań ata Grekııanyń áýe keńistiginde ushaqtardyń qozǵalysy toqtady, dep habarlaıdy Euronews.

Basylymnyń habarlaýynsha, alǵashqy taratylǵan aqparattarǵa qaraǵanda, radıojıilikter boıynsha aqaýlar týyndady. Soǵan baılanysty Grekııanyń áýe keńistiginde ushaqtardyń qozǵalysy toqtatyldy.

Naqtyraq aıtqanda, ushaqtardyń dıspetcherlermen baılanysyn qamtamasyz etetin baılanys júıesiniń jumysy buzyldy.

Daǵdarystyń alǵashqy saǵattarynda negizinen halyqaralyq reısterdiń qonýy qalypty, qaýipsiz ótip jatty.

Alaıda, keıinirek ERT telearnasy Grekııa áýejaılaryna qonýy tıis ushaqtardyń ózge áýejaılarǵa jiberilip jatqany týraly habar taratty. Olardyń kópshiligin negizinen Túrkııa áýejaılary qabyldady.

Azamattyq avıatsııa basqarmasy ókiliniń habarlaýynsha, Afıny áýejaıynda ushýmen baılanysty problemalar paıda bolǵan. Basqarma qyzmetkerleri jaǵdaıdyń mán-jaıyn anyqtaý úshin tehnıkalyq qyzmet ókilderimen jumys istep jatyr.

Radıojıilikterdiń ótkizý qabileti kúrt qysqardy, ıaǵnı ushaqtar men dıspecherlik qyzmetpen baılanysty joq.

- Áýelde basymdyq áýedegi ushaqtarǵa qyzmet kórsetý bolatyn. Endi tek halyqaralyq reısterdiń keıbiri ǵana qabyldanyp jatyr,-dep habarlady «Venızelos» áýejaıyndaǵy derekkóz.

Osyǵan deıin grekııalyq temirjolshylardyń ereýilge shyqqany týraly jazdyq.