Grekııalyq baıqaýshylar saılaýdyń zań aıasynda ótip jatqandyǵyn málim etti
ASTANA. QazAqparat - Qazaqstandaǵy parlamenttik saılaý qajetti deńgeıde ótip jatyr. Bul týraly búgin Astanada bergen baspasóz máslıhatynda Grekııa atynan kelgen halyqaralyq baıqaýshy, Grekııa-eýrazııalyq iskerlik keńesiniń prezıdenti Spırıdon Kývelıs málim etti.
«Bizdi saılaý barysyn baqylaýǵa shaqyrǵan bolatyn, keshe biz birneshe saılaý ýchaskelerine bardyq. Onda biz barlyǵy qajetti deńgeıde ótip jatqandyǵyn kórdik. Barlyǵy jaqsy uıymdastyrylǵan. Bizge saılaýǵa túsip jatqan saıası partııalar týraly, depýtattyqqa úmitker azamattar týraly málimetter usynyldy. Biz úderis barysyn qadaǵalap otyrdyq. Biz til bilmesek te, barlyǵy joǵary deńgeıde ótip jatqandyǵyn aıtýǵa bolady», - dep túıdi sózin grekııa baıqaýshysy.
Onyń aıtýynsha, daýys berý ýchaskelerinde saılaý bastalǵan kezdegi jaǵdaı da zań aıasynda ótken.
«Búgin biz Syrtqy ister mınıstrliginiń kómegimen Astanadaǵy 5-6 saılaý ýchaskesinde boldyq jáne daýys berýge halyq kóp kelgenin baıqadyq. Biz tirkeýden ótken soń, saılaý protsesine qatysty málimettermen tanystyrdy jáne bizdiń saýaldarymyzǵa jaýap berdi. Saılaý jáshikteri mórlengen jáne daýys berý protsesiniń ózi jaqsy uıymdastyrylǵan. Menińshe, saılaý joǵary deńgeıde ótti», - dedi S.Kývelıs.
