Grekııalyq temirjolshylar ereýilge shyqty

ASTANA. KAZINFORM — Grekııalyq temirjolshylar saladaǵy ózekti máselelerdi sheshýdi talap etip, el boıynsha 24 saǵattyq ereýilge shyqty.

Report agenttiginiń málimetinshe, ereýilge Hellenic Train jumysshylary men mashınıster kásipodaǵy qatysty. Sherý ótip jatqan ýaqytta biraz poıyzdar toqtap, keıbir jolaýshylar sońǵy stantsııalarǵa avtobýspen jetti. Bul rette kásipodaq músheleri ereýil kezinde poıyzdardyń sany az bolatyn eskertken. 

Jumysshylardyń ereýilge shyǵýyna temirjol kompanııasynyń kúrdeli máselelerdi sheshýge salǵyrttyq tanytyp otyrǵandyǵy túrtki bolǵan. Kásipodaq kótergen negizgi máseleler qatarynda marshrýttardyń keshigýi, kadr tapshylyǵy bar. Olar qaýipti eńbek jaǵdaıyn, ınfraqurylymnyń talapqa saı bolmaýy men mańyzdy mamandardyń tapshylyǵyn alǵa tartty. Sondaı-aq qyzmetkerlerdiń azdyǵy jumystyń kóbeıip, aýyr kestege ákelip soqtyratynyn, bul jumysshylar men jolaýshylardyń ómirine qaýip tóndiretinin aıtty. 

Sonymen qatar temirjolshylar Hellenic Train ákimshiliginiń qyzmetkerlerdi jumystan shyǵarýyna qarsy. Olar jumysshylardyń densaýlyǵy men qaýipsizdigin qamtamasyz etý boıynsha sharalar qabyldaýdy talap etip otyr.

Aıta keteıik, Grekııa parlamenti 13 saǵattyq jumys kúnin maquldady.