Grekııalyq kompanııa Qazaqstanda irimshik pen sút ónimderin óndirýge qyzyǵýshylyq tanytty
ASTANA.KAZINFORM - Aýyl sharýashylyǵy mınıstri Aıdarbek Saparov Grekııanyń Desserta Hellas kompanııasynyń basshylary Afanasıos Platanıas pen Iozef Braýnshofermen kezdesti. Kezdesýge Qazaqstannyń Grekııa Respýblıkasyndaǵy Tótenshe jáne Ókiletti Elshisi Tımýr Sultanǵojın de qatysty.
Aıdarbek Saparov Qazaqstannyń agroónerkásip kesheni salasynda Grekııamen ekijaqty yntymaqtastyqty damytýǵa erekshe mán beretinin atap ótti.
2025 jyldyń qorytyndysy boıynsha Qazaqstan men Grekııa arasyndaǵy aýyl sharýashylyǵy ónimderiniń taýar aınalymy aldyńǵy jylmen salystyrǵanda 12%-ǵa artty.
– Mınıstrlik saýda-ekonomıkalyq baılanystardy odan ári nyǵaıtýǵa jáne birlesken ınvestıtsııalyq jobalardy júzege asyrýǵa múddeli. Eki el arasyndaǵy aýyl sharýashylyǵy ónimderiniń taýar aınalymynyń artýy yntymaqtastyqty keńeıtýge qolaıly negiz qalyptastyryp otyr, – dedi mınıstr.
Taraptar Qazaqstannyń sút salasynyń áleýetin, shıkizatpen qamtamasyz etilý deńgeıin, ınvestorlarǵa kórsetiletin memlekettik qoldaý sharalaryn, sondaı-aq qosylǵan quny joǵary ónim óndirisin Qazaqstanda jolǵa qoıý múmkindikterin talqylady.
Kelissózderdiń negizgi taqyryby Qazaqstanda irimshik pen sút ónimderin óndirýdi jergiliktendirýge baǵyttalǵan ınvestıtsııalyq jobany iske asyrý perspektıvalary boldy.
Desserta Hellas kompanııasynyń ókilderi Qazaqstanda óndiristi iske qosýǵa jáne qazaqstandyq seriktestermen uzaq merzimdi yntymaqtastyqty damytýǵa qyzyǵýshylyq tanytatynyn rastady.
Aıdarbek Saparovtyń aıtýynsha, búginde Qazaqstanda irimshik óndiretin 64 kásiporyn jáne jylyna shamamen 2,7 mln tonna sút óńdeý qýatyna ıe 182 sút óńdeý kásiporny jumys isteıdi.
Memleket aýyl sharýashylyǵy ónimderin óńdeý salasyndaǵy jobalardy júzege asyratyn kásiporyndarǵa keshendi qoldaý kórsetedi. Qoldanystaǵy qoldaý sharalarynyń qatarynda tereń óńdelgen ónim óndirýge qajetti shıkizatty satyp alý shyǵyndaryn sýbsıdııalaý, ınvestıtsııalyq shyǵyndardyń 25%-yna deıin óteý, kredıtter boıynsha syıaqy mólsherlemesin sýbsıdııalaý, sondaı-aq aınalym qarajatyn jyldyq 5%-ben jeńildetilgen qarjylandyrý qarastyrylǵan.
Kezdesý qorytyndysynda mınıstr atalǵan jobany júzege asyrýǵa qajetti qoldaý kórsetýge daıyn ekenin jetkizdi.
Desserta Hellas kompanııasynyń bastamasyn iske asyrý Qazaqstan men Grekııa arasyndaǵy ınvestıtsııalyq yntymaqtastyqty odan ári nyǵaıtyp, elimizdiń sút óńdeý salasynyń damýyna serpin beredi.
Aıta keteıik, Pavlodar ǵalymdary Naýryz kóje negizinde jańa sút sýsynyn ázirleıdi.
