Grekııadaǵy referendýmnyń aldyn ala málimetteri: 61%-dan astam saılaýshylar «joq» dedi
ASTANA. QazAqparat - Grekııadaǵy referendýmda ýchaskelerdiń 51,88%-y bıýlletenderin óńdeý qorytyndylary boıynsha málimetterge qaraǵanda, saılaýshylardyń 61,24%-y nesıe berýshiler talaptaryna «joq» dedi, 38,76%-y «ıá» dep jaýap qaıtardy, dep habarlady RIA Novostı.
Aldyn ala málimetter boıynsha, daýys berýge saılaýshylardyń 60,01%-y qatysqan. Jaramsyz bıýlletenderdiń jáne daýys berýde qalys qalǵandardyń sany 5,7%-dy qurady.
Referendým qorytyndylaryn shyǵarýda jaramdy bıýlletender ǵana esepke alynady.
Mınıstrler kabıneti halyqtyń «joq» deıtinine úmit artty. Oppozıtsııa áńgime Grekııanyń eýropalyq keleshegi jóninde bolyp otyrǵanyn málimdep, sondyqtan da kelisimge «ıá» dep daýys berýge shaqyrdy. Grek referendýmyna búkil álemniń nazary aýyp otyr, óıtkeni onyń túpkilikti qorytyndylary kóp jaǵdaıda Eýropanyń aldaǵy saıası jáne ekonomıkalyq damýyn belgileıdi jáne búkil álemdik ekonomıkaǵa áser etedi.
