Grekııadaǵy poıyz apatynyń sebebi ne
Qaıǵyly oqıǵa seısenbi kúni tún ortasyna qaraı oryn alǵan. Afınadan Salonıkı qalasyna jol tartqan jolaýshylar poıyzy joǵary jyldamdyqpen júıtkip kele jatyp, qarsy shyqqan júk poıyzymen betpe-bet soqtyǵysqan. Sonyń saldarynan jolaýshylar poıyzynyń úsh vagony relsten shyǵyp ketip, artynan órt tutanǵan.
Júk poıyzynyń dál sol jolǵa nelikten túskeni ázirshe belgisiz. Tótenshe jaǵdaıdy tergeý aıasynda Larısa qalasynyń temir jol stansasy bastyǵynyń tutqynǵa alynǵany, onyń ústinen birneshe adamnyń ólimine sebep bolǵan tasymaldaý qaýipsizdigin buzýmen baılanysty aýyr qylmys boıynsha is qozǵalǵany týraly habar bar. Biraq, onyń aty-jóni jarııalanǵan joq. Eger stansa bastyǵynyń kinási dáleldenetin bolsa, onda ol Grekııa Qylmystyq kodeksiniń 291 babyna sáıkes 10 jyldan ómir boıǵa deıin bas bostandyǵynan aıyrylýy múmkin.
Foto: REUTERS
Apatqa kim kináli?
Grekııanyń ERT1 telearnasynyń quqyq qorǵaý organdaryndaǵy derekkózine silteme jasap habarlaýynsha, stansa bastyǵy óziniń kináli ekendigin moıyndaǵan.
«Men qatelik jberdim. Katerınıden kommertsııalyq júk poıyzy kele jatqan baǵdarǵa jolaýshylar poıyzyn jónelttim», - dep moıyndaǵan stansa bastyǵy.
Associated Press agenttiginiń derekterine qaraǵanda, jol apatynan keminde 43 adam qaza tapqan. Qaza tapqandardyń arasynda kishkentaı balalar men stýdentterdiń sany basym. Sonymen qatar 9 temirjolshy mert bolǵan. Grekııa Qarjy mınıstrligi qaza tapqandardy jerleý rásimin memleket qarajaty esebinen júzege asyrý týraly sheshim shyǵardy.
Larısa qalasynyń bas koroneri Rýbını Leondarı ólgen adamdardyń kim ekenin anyqtaý úshin DNK-saraptama qajet ekenin aıtyp otyr. Óıtkeni, máıitter adam tanymastaı búlingen. Órt sóndirýshiler de jalyn temperatýrasy 1300 gradýsqa jetkenin aıtýda.
Hellenic Train temir jol kompanııasynyń málimetterine sáıkes, eki poıyzda jalpy 354 adam bolǵan. Onyń ishinde jolaýshylar poıyzynda 12 brıgada múshesi men 342 jolaýshy, al júk poıyzynda 2 adamnyń bolǵany anyqtalyp otyr. Grek órt sóndirý qyzmetiniń aqparatyna qaraǵanda, poıyzdar soqtyǵysqannan keıin 72 adam aýrýhanaǵa túsken. Olardyń 15-i sársenbi kúni keshkisin úılerine jiberildi.
Foto: REUTERS
Osy qaıǵyly oqıǵadan keıin eldiń Kólik mınıstri Kostas Karamanlıs resmı málimdeme jasap, qyzmetinen ketetindigin ashyq aıtty.
«Qazir ǵana Tempe qalasynan, qaıǵyly oqıǵa oryn alǵan jerden oraldym. Júrek aýyrady. Grek temir jolyn 21 ǵasyrǵa saı kelmeıtin jaǵdaıda alǵanymyz fakti. Osy 3,5 jyldyń ishinde mundaı jaǵdaıdy jaqsartý úshin barlyq kúsh-jigerimizdi jumsadyq. Ókinishke qaraı, bul kúsh-jigerimiz mundaı apattyń aldyn alýǵa jetkiliksiz bolyp shyqty. Jáne de bul barlyǵymyz úshin de, jeke ózim úshin de óte aýyr jaıt. Osyndaı qaǵyly oqıǵalar oryn alǵannan keıin túk bolmaǵandaı ary qaraı jumys isteı berý múmkin emes», - dep jazdy ol Facebook paraqshasynda.
Foto: Zuma/TASS
Sonymen qatar Kólik mınıstri saıasatta birneshe jyldan beri júrgenin, biraq, el azamattarynyń saıası júıege senim artýy demokratııanyń mańyzdy elementi sanaıtynyn atap ótedi.
«Muny saıası jaýapkershilik dep ataıdy. Osy sebepti men Infraqurylym jáne kólik mınıstri laýazymynan otstavkaǵa ketetindigimdi jarııalaımyn. Ómirden ádiletsiz ótken adamdarǵa tym bolmaǵanda qurmet retinde áreket etýdi jáne grek memleketi men saıası júıeniń der ýaqytynda túzemegen qateligine jaýapkershilikti óz moınyma alýdy paryzym dep sanaımyn», - dedi Kostas Karamanlıs.
Poıyzdar nege soqtyǵysty? Boljam
ERT1 telearnasynyń málimetinshe, Grekııa temir joldary uıymy Mashınıster federatsııasynyń (OSE) prezıdenti Kostas Genıdýnıas poıyzdardyń soqtyǵysýyna qatysty óziniń boljamyn bildirgen. Onyń atap ótýinshe, temir joldaǵy apat avtomattandyrylǵan eskertý júıesiniń isten shyǵýy saldarynan eki poıyz bir jolǵa túsýi yqtımal.
«Eshteńe jumys istemeıdi. Munyń barlyǵy adamı faktordy qoldaný arqyly, ıaǵnı qolmen jasalyp otyr», - dedi Mashınıster federatsııasynyń prezıdenti.
Kostas Genıdýnıastyń sózine qaraǵanda, eger júıe jumys istep turǵan kezde mashınıster qyzyl dabyl belgisin baıqap, poıyz 500 metrlik araqashyqtyqta toqtar edi.
Foto: REUTERS
«Keıbir vagonda rdaǵy jolaýshylar shyǵa almaı qaldy»
Reuters agenttigi poıyzdar soqtyǵysqannan keıin vagondar aýdarylyp, órt qushaǵyna oranǵan sátti bastan keshirgen jolaýshylardyń «10 sekýnd ishindegi» jantúrshigerlik oqıǵalaryn jarııalady.
Qıraǵan vagonnan sekirip aman qalǵan 28 jastaǵy Stergıos Mınenıs qatty jarylysty estigenderin aıtady.
«Biz vagonmen birge ol búıirlep qulaǵanǵa deıin aýnadyq. Sodan keıin dúrbeleń bastalyp ketti. Vagondy birden órt sharpydy. Aýnap kele jatqan kezdiń ózinde órt shyqqan bolatyn. Barlyq jerde qyzyl jalyn boldy. 10-15 sekýndtyń ishinde naǵyz alasapyran oryn aldy», - dep eske alady Stergıos Mınenıs.
Al Grekııanyń Skai telearnasyna suhbat bergen tiri qalǵan jolaýshylardyń biri óte qorqynyshty bolǵanyn eske alady.
Foto: AR
«Baqytymyzǵa oraı biz esikti óte jyldam ashyp, syrtqa shyǵa aldyq. Al ózge vagondaǵy adamdar shyǵa almaı qaldy», - dedi ol.
Grekııada úsh kúndik ulttyq aza tutý jarııalandy
Aıta keterligi, qaıǵyly oqıǵa oryn alǵan kezde Grekııa Prezıdenti Katerına Sakellaropýlý Moldovada resmı saparmen júrgen bolatyn. Qaıǵyly oqıǵany estigennen keıin ol saparyn toqtatý týraly sheshim qabyldady.
«Saparymdy toqtatyp, otanyma oralýǵa májbúrmin. Óıtkeni, qazirgi ýaqytta bizdiń barlyq oıymyz poıyzda bolǵan adamdarmen, jaqyndarynan aıyrylǵandardyń týǵan-týystarymen, jaraqattanǵandarmen birge», - dedi ol Kıshınevte ótken brıfıng barysynda.
Al Grekııa Premer-Mınıstriniń sheshimimen 1-3 naýryz kúnderi elde úsh kúndik ulttyq aza tutý kúni dep jarııalandy.
Jastar ereýili
TASS agenttiginiń aqparatyna qaraǵanda, osy qaıǵyly oqıǵadan keıin grek jastary Afına men Salonıkı qalalarynda narazylyq aktsııasyn uıymdastyrdy. Naqtyraq aıtsaq, Afınada jastar Grekııadaǵy barlyq jolaýshylar men júk tasymalyn júzege asyratyn ıtalıandyq Hellenic Train temir jol kompanııasynyń keńsesine jınaldy. Jastardyń túrli uıymdarynyń ókilderi maısham jaǵyp, qara transparantter kóterdi. Alaıda, polıtsııa arnaýly jasaǵynyń otrıady kózden jas aǵyzatyn gaz qoldanyp, jastardy keńse aldynan yǵystyrdy.
Salonıkı jastary da narazylyq sherýin ótkizdi. Іs-sharaǵa shamamen 2 myń adam qatysyp, olar qala ortalyǵymen júrip ótti. Sonymen qatar jańadan salynǵan Salonıkı temir jol vokzaly mańyna baryp, poıyz apatynan mert bolǵandardyń qurmetine gúl shoqtaryn qoıdy.
Foto: AR/TASS
