Grekııadaǵy bosqyndar lagerin órtedi degen kúdikke ilingen alty adam ustaldy
MITILINI. QazAqparat – Grekııa bıligi Lesbos aralynda bosqyndardyń Morııa lagerin órtep jiberdi degen kúdikke ilingen alty adam ustalǵanyn jarııalady. Bul týraly QazAqparat Euronews agenttigine silteme jasap habarlaıdy.
Ustalǵandardyń barlyǵy – Aýǵanstan azamattary, olardyń ishinde ekeýi kámelettik jasqa jetpegen. Órtten keıin olar qurlyqtyq Grekııaǵa evakýatsııalandy. Qazir olarmen tergeý amaldary júrgizilip jatyr.
Lesbostaǵy órt oqıǵasynyń tergeý amaldaryn Azamattardy qorǵaý mınıstri Mıhalıs Hrısohoıdıs júrgizip jatyr.
Lesbosta mıgranttarǵa arnalǵan jańa lagerdiń qurylys ornyna Eýropalyq Odaq tóraǵasy Sharl Mıshel bardy. Ol Eýroodaqtyń Grekııamen mıgranttar problemasyn sheshýge múddeli ekendigin mindetti túrde tanytatynyn málimdedi.
«Bul jaǵdaı – aýyr ári kúrdeli. Biraq men EO atynan mıgratsııamen baılanysty problemany nazardan tys qaldyrýǵa jol bermeıtinimdi málimdegim keledi. Bul – bizdiń ortaq, eýropalyq problema», - dedi ol.
Seısenbi kúni Lesbostaǵy eń iri qala Mıtılınıde solshyl partııalar jáne kásipodaqtar uıymdastyrǵan demonstratsııa ótken. Demonstranttar qonys aýdarýshylar Eýropa elderine turaqtap, jańa ómir bastaýǵa múmkindik alýǵa tıis dep málimdedi.
