Grekııadaǵy jer silkinisinen keıin tsýnamı týraly eskertý jarııalandy

ASTANA. KAZINFORM — Jerasty dúmpýleriniń kúshi 6,1 baldy qurady. Jer silkinisi Dodekaneste sezildi. Tsýnamı qaýpi týraly eskertý jarııalandy, dep habarlaıdy Euronews.

Sarapshylar «óte kúshti» dep sıpattaǵan magnıtýdasy 6,1 jer silkinisi seısenbige qaraǵan túni Grekııanyń Kasos aralynan ońtústik-batysqa qaraı 19 shaqyrym jerde nemese Krıtten shyǵysqa qaraı teńiz sýynda boldy. Afına Ulttyq observatorııasynyń Geodınamıkalyq ınstıtýtynyń málimetinshe, onyń oshaǵy 64,4 shaqyrym tereńdikte ornalasqan.

Nemistiń geoǵylymdar zertteý ortalyǵy (GFZ) óz kezeginde jer silkinisin 6,3 balǵa, al oshaqtyń tereńdigin 83 shaqyrymǵa baǵalady.

Afınanyń Makedonııa aqparat agenttiginiń habarlaýynsha, jer asty dúmpýi Dodekanestiń búkil aýmaǵynda, sondaı-aq Krıttiń shyǵysynda sezilgen. 

Aldyn ala aqparat boıynsha, kómekke shaqyrtý týraly telefon qońyraýy túspegen. Qazirgi ýaqytta materıaldyq shyǵyn týraly habarlama kelmegen. Alaıda qutqarý kólikteri jaǵdaıdy anyqtaý úshin aýmaqty patrýldeý ústinde. 

Sondaı-aq saqtyq sharasy retinde tsýnamı týraly eskertý jarııalandy. 

Jer silkinisin josparlaý jáne olardan qorǵaý agenttiginiń basshysy Eftımıos Lekkas ERTNews-ke jer silkinisiniń eýropalyq jáne afrıkalyq plıtalar soqtyǵysatyn grek doǵasynda bolǵanyn habarlady.

Onyń aıtýynsha, bul jer asty dúmpýleriniń Santorınıdegi nemese jaqynda Túrkııadaǵy jer silkinisimen eshqandaı baılanysy joq.

Buǵan deıin Grekııa jaǵalaýynda 6,4 magnıtýdalyq jer silkinisi bolǵanyn jazǵanbyz.