Grekııadaǵy orman órtterinen 12 myń gektar jer órtenip, úsh órt sóndirýshi qaza tapty
ASTANA. KAZINFORM — Turǵyndar aldyn ala teńiz arqyly evakýatsııalandy. Ekpindi jel órtti sóndirý jumystaryn qıyndatyp otyr, dep habarlaıdy Kazinform Deutsche Welle-ge silteme jasap.
Afınydan 70 shaqyrym jerde ornalasqan Porto-Germeno kýrorttyq aýylynyń mańyndaǵy Korınf shyǵanaǵy aımaǵynda 6,5 myń gektardan astam jer órtenip ketti. Taǵy shamamen 6 myń gektar aýmaq Krıt pen Paros araldaryndaǵy órt saldarynan joıyldy. Sonymen qatar Kefalonııa aralynda jańa órt oshaǵy tirkeldi.
Jergilikti qyzmetterdiń málimetinshe, ekpini kúshti jel órtpen kúresýge kedergi keltirip otyr. Ushaqtarǵa týrbýlenttilikke baılanysty sý alyp, ony órt oshaqtaryna tógý qıynǵa soǵyp jatyr.
Keıingi kúnderi órtpen kúres kezinde úsh órt sóndirýshi qaza tapty: ekeýi Krıt aralynda, bireýi Peloponnes túbeginde kóz jumǵan.
Órt sóndirý qyzmetiniń málimetinshe, bir táýliktiń ishinde Grekııada birneshe ondaǵan órt oshaǵy tirkelip, olardyń kóbi aýyzdyqtalǵan. Ortalyq Grekııadaǵy Beotııa aımaǵyna qarasty Lıvadosta eldi mekeninde órt qaıta órshidi. Sondaı-aq Peloponnes túbeginiń soltústigindegi Panorama-Eıalıas eldi mekeni mańyndaǵy iri órtti sóndirý jumystary jalǵasyp jatyr. Ol jerge 25 tehnıkamen 83 órt sóndirýshi jáne jaıaý órt sóndirýshilerden quralǵan 4 top jumyldyrylǵan. Áýeden sóndirý úshin tórt ushaq pen eki tikushaq tartyldy.
Krıt aralynyń Retımno aımaǵynda úsh kún boıy jalǵasqan orman órti jaǵdaıy aıtarlyqtaı jaqsarǵan. Alaıda órt sóndirýshiler daıyndyq rejıminde qalyp, daýyldy jeldiń áserinen qaıta paıda bolyp jatqan órt oshaqtaryn sóndirýdi jalǵastyryp jatyr. Ekpindi jel saldarynan bul aýmaqta áli de órt sóndirý avıatsııasyn paıdalaný múmkin bolmaı otyr.
Eske salaıyq, buǵan deıin Grekııanyń birneshe aımaǵynda orman órti tutanǵanyn habarlǵanbyz.
