Grekııada júrsek te Qazaqstandy umytpaımyz - Jenıa Navrozıdı

QYZYLORDA. QazAqparat - Búginde Grekııanyń Katerını qalasynda turyp jatqan Jenıa Navrozıdı ata-anasy Qazaqstanǵa jer aýdarylǵanda nebári 13 jasta eken. Osynda ósip, kúrish dalasynda eńbek etti. Keıinnen qazaq jigitine turmysqa shyǵyp, alty bala súıdi, Qudaı qosqan qosaǵy erterek dúnıe salyp, balalaryn ózi aman-esen ósirdi. Óz ómirinde jergilikti halyqtyń jyly yqylasyn kórip, aıaly alaqan jylýyn sezingen ol qashanda qazaq halqyna rızashylyǵyn bildiredi, dep habarlaıdy QazAqparat tilshisi.

Búginde seksen jastyń seńgirine shyqqan keıýananyń ata-anasy 1949 jyly Grýzııa respýblıkasy quramyndaǵy Abhazııa avtonomııalyq SSR-nen Qyzylorda oblysyna jer aýdarylǵan. Sol ýaqyttaǵy solaqaı saıasat saldarynan grekterge ornalasqan eldi mekennen syrtqa shyǵýǵa ruqsat etilmedi.

Olardyń otbasysy qazirgi Syrdarııa aýdanynyń ortalyǵy Tereńózek kentine qonystandy. Osylaısha mekeninen kúshten kóshirilgen birneshe otbasy jergilikti halyqtyń qamqorlyǵyn kórdi. Olarmen etene jaqsy aralasty. Boıjetken qyz beride qazaq jigitine turmysqa shyǵyp, alty balanyń anasy atanady. Súıip qosylǵan jary dúnıeden erte ótti. Sol ýaqytta Jenıa keńsharda kúrishtikte eńbek etedi eken. Budan keıin ol jas qalǵan balalaryn ósirý úshin oblys ortalyǵyna qonys aýdarýdy. Qyzylordada kúrish zaýytynda, onan keıin qalalyq prokýratýrada tazalyqshy bolyp jumys isteıdi.

Ótken ǵasyrdyń 80-jyldarynyń sońynda ol kisi tarıhı otany - Grekııaǵa qonys aýdardy. Mine, sol ýaqyttan beri Grekııanyń Katerını qalasynda turyp jatyr. Bul - Egeı teńizi jaǵalaýynda ornalasqan tabıǵaty kórkem, týrıster úshin óte tartymdy qala. Ol kisiniń qyzdary Gýlıa, Sofııa, Roza búginde Syr óńiriniń kelini bolyp úlgirgen. Olardan nemere, shóbere kórip otyrǵan jaıy bar.

«Men qazaqtyń kelinimin. Qashanda aqjarqyn keıpinen tanbaıtyn qazaq halqyn jaqsy kóremin. Basyna qıyn-qystaý kún týyp, taǵdyr tálkegine túsken san túrli ultty jatyrqaǵan joq. Olarǵa qushaǵyn ashyp, baýyryna basty. Olardyń barlyǵy qazaqtardyń keńpeıildigi men meıirbandyǵyn kórdi. Bul jaqqa kóship kelgenimizge otyz jyldaı ýaqyt boldy. Grekııada júrek te Qazaqstandy umytpaımyz. Áli kúnge deıin qazaqylyqty saqtaýǵa tyrysamyn. Qazaq tilin ana tilimnen artyq bilemin. Qoıýlatyp sút qatqan sháıdi kesemen ishemin. Baýyrsaq pisirip, et asamyz. Naýryzda arnaıy merekelik dastarhan jaıamyz. Odan osy jaqta aralasatyn jandarǵa aýyz tıgizemiz», - dedi qarııa áleýmettik jeli kómegimen bolǵan baılanysta.