Grekııada jasóspirimderge ishimdik satqandar jaýapkershilikke tartylady

ASTANA. KAZINFORM — Grekııa úkimeti barmender men daıashylardyń kámeletke tolmaǵandarǵa ádeıi alkogol usynýyn alǵash ret qylmys dep tanýdy kózdeıtin jańa zań jobasyn qolǵa aldy, dep jazady AZERTADJ.

Bul bastama eldegi kámeletke tolmaǵandardyń alkogol men temeki tutynýyna qarsy kúreske baǵyttalǵan keń aýqymdy kampanııanyń bir bóligi. Sebebi Grekııada mundaı shekteýler uzaq ýaqyt boıy eleýsiz qalyp kelgen.

Grekııanyń densaýlyq saqtaý mınıstri Adonıs Georgıadıs usynǵan jańa zań jobasy burynnan bar, biraq is júzinde oryndalmaı kelgen zańdardy kúsheıtýge baǵyttalǵan, dep jazady iefimerida.gr onlaın basylymy.

Bul sharalar kámeletke tolmaǵandar arasyndaǵy alańdatarlyq statıstıka aıasynda qolǵa alynyp otyr. Zertteýlerge sáıkes, 16 jastaǵy grekterdiń 92%-y alkogolge ońaı qol jetkize alatynyn aıtqan.

Densaýlyq saqtaý mınıstri jastardy alkogoldi shamadan tys tutynýdyń qaýipti áserinen qorǵaýǵa basymdyq berilip otyrǵanyn atap ótti. Sebebi bul — Eýropada 16-25 jas aralyǵyndaǵy adamdar arasyndaǵy ólim-jitimniń negizgi sebepteriniń biri.

Usynylǵan zań jobasyna sáıkes, kámeletke tolmaǵandarǵa qyzmet kórsetkeni úshin zańdy jaýapkershilik tek kásip ıelerine ǵana emes, ishimdikti quıyp bergen jekelegen qyzmetkerlerge de júkteletin bolady.

Sonymen qatar, zań jobasy kámeletke tolmaǵandar qatysatyn keshterdi qatań retteýdi usynady. ıAǵnı, mundaı keshter (barlarda nemese klýbtarda ótetin bolsa) Grekııanyń Tsıfrlyq basqarý mınıstrliginde tirkelýi tıis.

Temekige qatysty zań jobasy ár satý kezinde qujattardy qatań tekserýdi mindetteıdi. Bul — ata-analardyń balasyn dúkenge temeki alýǵa jiberý sııaqty keń taralǵan tájirıbege qarsy baǵyttalǵan shara.

Atalǵan zań jobasynyń usynylýy — Grekııada mádenı turǵydan betburys kezeńiniń bastalýy retinde baǵalanyp otyr. Sebebi elde jaqynda ǵana qoǵamdyq oryndarda temeki shegý qalypty jaǵdaı sanalsa, al kámeletke tolmaǵandardyń alkogol tutynýyna keńinen kóz juma qaraıtyn.

Buǵan deıin Grekııa halyqqa qarjylyq jeńildikter týraly jarııalaǵany belgili boldy.