Grekııada jappaı ereýilge baılanysty ondaǵan áýe reısteri toqtatyldy
ASTANA. 19 qazan. QazAqparat - Grekııada jappaı ereýilge baılanysty ondaǵan áýe reısteri toqtatyldy, dep habarlaıdy «RIA Novostı» aqparattyq agenttigi.
Áýe dıspetcherleriniń úsh saǵattyq ereýiline baılanysty osy ýaqytqa belgilengen barlyq jolaýshylar áýe reısteri toqtatyldy.
«Elefterıos Venızelos» Afıny Halyqaralyq áýejaıynyń habarlaýynsha, osy ýaqytta elge kelip qonýy tıis 23 reıs pen elden ushýy kerek 23 reıs toqtatyldy.
Ereýilge baılanysty Grekııada sý men temirjol qatynasy da toqtap tur. Afınyda trolleıbýs, taksı men qalaaralyq elektr poıyzdary da júrmeıdi. Búkil elde memlekettik mekemeler, mektepter men ýnıversıtetter, bankter men birqatar dúkender de bul kúni jabyq bolady. Týrıster ereýilge baılanysty súıikti murajaılary men sáýlet eskertkishterin kóre almaıtyn boldy. Afıny ortalyǵynda úkimettiń ekonomıkalyq saıasatyna jappaı qarsylyq sharalary uıymdastyrylady dep kútilýde.
