Grekııada jappaı ereýil ótip jatyr
ASTANA. 22 qyrkúıek. QazAqparat - Beısenbi kúni Grekııada 24-saǵattyq jappaı ereýil bastaldy. Bul týraly sheteldik BAQ-qa silteme jasap, Bnews.kz habarlaıdy.
Aktsııaǵa metro jáne tramvaı parkteriniń jumysshylary, memlekettik emhana dárigerleri, farmatsevter, sýdıalar, birqatar ýnıversıtet oqytýshylary men kóptegen qonaqúılerdiń qyzmetkerleri qatysty.
«Olar halyqaralyq nesıe berýshilerdiń kelisimi aıasynda úkimet ázirlep jatqan eńbekaqy men áleýmettik tólemderdi qysqartýǵa qarsy narazylyq bildirýde. Beısenbi kúni el úkimeti bıýdjet shyǵyndaryn 2-3 mlrd eýroǵa qysqartý týraly sheshim qabyldaýy tıis bolatyn», - dep atap ótti Grekııanyń Ekathimerini gazeti.
Ereýilge qatysqandar eńbekaqynyń qysqarýyna ǵana qarsy shyqqan joq, olar qalalyq kóliktiń jolaqysyn 2009 jylǵy deńgeıge, ıaǵnı 1 eýroǵa deıin arzandatýdy talap etip otyr (qazirgi jolaqy baǵasy - 1.40 eýro). Sondaı - aq, kásipodaqtar bılikten jumyssyzdarǵa, stýdentter men tómen zeınetaqy alatyn adamdardyń qoǵamdyq kólikte tegin júrýin talap etýde.
Grekııa baspasóziniń habarlaýynsha, dárigerler, farmatsevter jáne sot qyzmetkerleri ereýildi qyrkúıek aıynyń sońyna deıin jalǵastyrmaq. Al jappaı ereýil ótkizý 26 qyrkúıek kúnine belgilenip otyr.
