Grekııada jaǵajaıdaǵy jartas qulap, jurttyń úreıin ushyrdy
ZAKINF. QazAqparat - Grek araly Zakınftiń Navaıos jaǵajaıynda jartas opyryla qulady, dep habarlaıdy QazAqparat Euronews-ke silteme jasap.
Tolqyn kóterilip, kemelerdi aýdaryp ketken. Birneshe adam aýrýhanaǵa jetkizildi. Olardyń arasynda arqasy jaraqattanǵan chehııalyq týrıst te bar. Dárigerlerdiń aıtýynsha, zardap shekkenderdiń ómirine esh qaýip tónbeıdi.
Qutqarýshylar úıindiniń astynda eshkim qalyp qoımaǵanyna kóz jetkizý úshin jartastyń qulaǵan synyqtary men sol mańdy qarap shyqty.
«Aldymen kishigirim bóligi, artynsha jartas túgeldeı qulady. Úlken tolqyn bir kemeni aýdaryp tastap, ekinshisiniń bortyna soǵylǵan, jaǵajaıdaǵy barlyq zattar sýmen aǵyp ketti. Kishigirim qaıyqtardyń barlyǵy sý astynda qaldy. Alyp tolqyn iri kemeni aýdaryp, ondaǵy adamdar sýǵa qulap tústi. Basqalary aýdarylǵan kemelerdegi adamdardy qutqarýǵa asyqty. Naǵyz sumdyq», - dedi kýágerler.
