Grekııada iz-túzsiz joǵalǵan úsh týrıst óli kúıinde tabyldy

ASTANA. KAZINFORM – Ótken seısenbide Grekııanyń Matrakıon aralyndaǵy qonaqúıde joǵalyp ketken 55 jastaǵy er adam jeksenbi kúni óli kúıinde tabyldy. Jergilikti BAQ-tyń málimetinshe, bul – eldegi keıingi aptada qaıtys bolǵan úshinshi týrıst, dep habarlaıdy Euronews. 

Nıderlandtan kelgen 74 jastaǵy er adam senbi kúni Samos aralynda serýenge jalǵyz shyqqany belgili boldy. Onyń denesi saıdan tabylǵan. Al, brıtanııalyq dáriger Maıkl Moslıdiń denesi bir apta buryn Sımı aralynan tabyldy. Ol taý baýraıynan qulap ketken. Bul týraly Sımı meri Lefterıs Papakalodýkas habarlady. 

Qazirgi ýaqytta taǵy birneshe týrıstiń iz-túzsiz joǵalǵany anyqtaldy. Olardyń arasynda Amorgos aralynda joǵalyp ketken 59 jastaǵy amerıkalyq Albert Kalıbet te bar.

Kalıbettiń birneshe týysy men dosy Los-Andjeles okrýginiń otstavkadaǵy polıtsııa qyzmetkerin izdeý úshin Grekııaǵa bardy. 

Sıkınos aralynda joǵalǵan eki frantsııalyq týrıst – 73 jáne 64 jastaǵy eki áıeldi izdeý operatsııasy jalǵasyp jatyr. Oǵan kórshiles Ios aralynan kelgen eriktiler, órt sóndirýshiler jáne polıtsııa qyzmetkerleri jumyldyrylǵan.